قارئة الفنجان
راندة محمود
قعدت تبص فى فنجانى
اتنهدت و قالت آه يانى
قومى خلاص من قدامى
راسي وجعانى
بكرة ح اكمل الكلام
بتقولي ده علشاني؟
ولا هو فض مجالس؟
وهجايص والسلام؟
شايفة حاجة ف فنجاني؟
ولا مش شايفة خالص؟
حقيقي ماشية و سيباني؟
اقعدي………
وفى دقيقة تكونى مخلصانى
لهد فوق راسك المكان
الفنجان كله بن
مش باين فيه غير الهم
وحطة الايد ع الخد
مش باين غير قلة البخت
ودموع فى العين مش نازلين
قلب ناشف بور
زودوا يا ولاد البخور
يمكن يتفك النحس
و القلب القاسي يحس
اشمعنى أنا يا وليه؟
اشمعنى عنى مخبية؟
سكة السفر البعيدة
اللى ح روحلها فى يخت
ولا انتي بتيجي بالشخط
فين الدنيا السعيدة
اللي فى خطوتين؟
وفين الدار الجديدة
اللى بعد نقطتين؟
انا بقرا المكتوب
فنجانك كله ذنوب
وحراس ماسكين كرابيج
معلقينك بالمقلوب
ونازلين فيكي ضرب
ولو قلتي أتوب
الحراس تغضب و تهيج
و تطوحك شرق و غرب
بتعملي ايه؟
ليه بتقفلى الباب بالترابيس؟
ليه ماسكة فى ايدك حزام؟
هوو انا ما قولتش للمدام؟
ان الفنجان ده مش بتاعي
وان الحراس دول اتباعى
الفنجان ده بتاع البعيدة
ودلوقتى وشك للحيطة
واستلمى اول رسالة
ميت جلدة ليكي يا دجالة
ودلوقتى اقلبك زي الشراب
واقطع لسانك يا وش الغراب
