نساء عظيمات ونماذج مصرية مشرفة متابعة /دامل ابو العلا. في محافظة المنيا وتحديداً في قرية الشيخ حسن مركز مطاي ساكنة الجدة “فريجة”.. سيدة مصرية أصيلة عندها حالياً 90 سنة بتعمل شغل مبدع في صناعة أطباق حفظ الخبز من سعف النخيل!.. الجدة “فريجة” من الناس المؤمنين إن العُمر مجرد رقم وإني طول ما فيا قدرة فأنا هشتغل ومفيش شيء هيمنعني!..
على مدار أكتر من 50 سنة عملت فيهم مئات الأطباق اللي الكل بيتهافت عليها بسبب جودة صنعتها.. العظيم في الموضوع إنها مش بتبيع الأطباق اللي بتعملها دي بفلوس لكنها بتديها هدية لأحفادها ولجيرانها ولكل الناس.. هي بتحب الشغل لمجرد الشغل!..
بتقول الحاجة “فريجة” في حوار مع الصحفي “حمد الترهوني”: (بدأت حياتى عاملة في المدرسة في القرية فى عهد الرئيس جمال عبد الناصر، وكنت بجيب العيش من المخبز غرب النيل للمدرسة من خلال مركب صغير.. بدأت اشتغل في مهنة صناعة الأطباق من أكتر من 50 سنة وبعد ما اتجوزت بسنتين بس.. ناس كتير كانوا عايزين يشتروا مني أطباق الخبز لكن أنا برفض بشدة وبقدمه كهدية للغريب والقريب رغم صعوبة حياتي المعيشية والحمد لله بصرف على حياتي من معاش تكافل وكرامة ربنا يباركله السيسي وقف جنب الغلابه بتكافل وكرامة)..
الحاجة “فريجة” كل يوم بتقعد تشتغل قدام الصندوق الخشب بتاعها من الساعة 8 الصبح وبتغني وهي بتشتغل بصوت جميل بيخلّي الناس يروحوا يقعدوا معاها ويتفرجوا عليها وهي بتشتغل..
كل أمنيتها في الحياة إن يبقى فيه وصلة إنارة للأوضة اللي هي عايشة فيها، ومبلغ مالي بسيط تقدر بيه تشتري مستلزمات الصنعة اللي بتعملها وبتسليها.. بتقول كمان حاجة مؤثرة إنها عاملة حساب الموت لما ييجي في أى وقت وأشترت الكفن بتاعها لإنها مش عايزة حد يشيل الهم بعد وفاتها.. ربنا يديها الصحة وطول العمر..
سيدة مصرية عظيمة ومحترمة وبتدينا كلنا درس في أهمية العمل وإنه عقيدة راسخة عند المصريين.. واثقين إن هيكون فيه استجابة لطلبات السيدة المُلهمة دي في أقرب وقت إن شاء الله، وواثقين إن قصتها علمت وهتعلم ناس كتير.
