شعر وادب

ذكرياااااااااات

 

لما الذكريات
تبقى قصص محكية
فى ادب السيرة الشعبية
ح تبقى عنترة ؟
و لا الزناتى خليفة؟
ولا ده و لا ده
انا ح ابقى البطلة الخفية
ورا سور الجنينة القديم
درعى غطا حلة خفيفة
وسيوفى خشبية
وكل كنوزى المخبية
تحت الشجرة العجوزة
سلسلة قديمة مصدية
وقصة لميكى
صفحاتها مقطوعة
وتذاكر سينما
كراسيها محجوزة
اعمارها فلكية
يمكن من ايام السينما الصامتة
ولمبة بايظة سلوكها مهزوزة
محطوطين فى صفيحة مهرية
وكان قدام بيتنا عربية مهجورة
بطارد فيها اعدائى الخيالية
وعندى حصان خشب
ابويا كان عاملهولى
اجرى بيه فى الغيطان
اللى كنت برسمها ع الحيطان
بس قلمى أمى رمتهولى
دى حكاوى
ياخدها الراوى يكتبها غناوى
ويفوت يقولها ع القهاوى
دى كانت بنت و عايشة هنا
وعقلها كان غاوى
يصورلها
انها ح تكون ذات اهمية
لا سيوفها
و لا درعها
شفع لها
وبقت
و لا حاجة منسية
والراوى لقى الحكاية
مش جايبة همها
قطعها و رماها
فى اقرب عربية زبالة معدية

راندة محمود

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى