أسرة و مجتمع

أبنك كنزك فلاتسمح لهم!!!!!

أبنك كنزك فلاتسمح لهم!!!!!

متابعة/ البتول إبراهيم 

اني لا اسمح لاي حد يتخطي حدوده مع اولادي بهزار قولا او فعلا غير مقبول

-ممنوع منعا باتا اسمح لحد يناديهم بلقب او صفه وحشه ( سمرا ، كارته، تخينه ، مسلوعه ، بضب ، قزعه……) هلم جرا طبعا او حاجه في صفاتهم ( عيوطه ، زنانه، عصبيه ، شقيه ، معفرته…..).
-ممنوع منعا باتا الهزار التقيل السمج بتاع طالعه لمين و ليه مش زي اختك و لا اخوكي و لا خالتك و لا عمتك و لا عم محمد البواب.

-ممنوع منعا باتا التعليق علي المستوي البدني ( مالها مش قادره تجري، مبتعرفش تعوم ، بتنهج كتير….) او التعليمي (مالها مش عارفه تقرا، مش شاطره ليه ،مبتعرفش تنطق….).
لان كل الكلام السلبي ده بياثر علي الطفل و بيفضل في المخ و العقل بيصدقه . و اثر علاج كلمه وحشه بياخد وقت و لازم قدامها ١٠٠ كلمه كويسه عشان تزيلي اثر الكلمه الوحشه.
-و اخيرا ممنوع المقارانات باي طفل اخر و لو اختها التوأم لان كل طفل ليه السمات الشخصيه بتاعته و الي بتختلف و المقارانات دي اول شيء مدمر لشخصيه الطفل و ثقته بنفسه.

طيب هتقلولي الرد يبقي ازاي ؟ اصل مش عايزين مشاكل ؟ طب اصل بيبقي هزار ؟ اصل ست كبيره هقولها ايه؟
هقولكم جمله كريم عبد العزيز في فيلم اضحك الصوره تطلع حلوه… ابنك و لا كل دول؟ ابني و لا سلفتي ، ابني و لا صحبتي ، ابني ولا جارتى

الرد يبقي حازم و بادب محدش قالك امسكي في خناق الناس بس كمان مش ممكن الي بيقول الكلام ده عنده دم و عمل الي عليه و تنمر علي ابني بمنتهي البجاحه و انا هخاف او اتحرج اني ادافع عن ابني و امنع عنه الاذي !! ميصحش حتي
بمنتهي الحزم …..

-ايه الوحاشه دي … لا مش وحشين و لا حاجه ده قمر….طبعا القرد في عين امه….طيب كويس انك عارفه اني امه فاكيد مش هقبل اي كلمه وحشه عليه حتي لو بهزار و مش هحب اسمع الكلام ده….ابه ده انتي زعلتي انا يهزر….اكيد زعلت و الحاجات دي مفيهاش هزار.

-هو ماله مش شاطر زي اخوه عليه ….لا خالص مين قالك كل واحد فيهم شاطر و متميز في حاجه
-هي تخينه كدا ليه….بالعكس دي مدملكه و قمر محبش حد يقول عليها تخينه عشان مسمعهاش كلمه تضايقها كل واحد فيه ميزه.

-ايه ده ده عنده ضب و مخليه وحش…. و لا الجمال نسبي و اكيد مش هنعيب علي خلفه ربنا هو في عيني اجمل ولد و خفه دمه بالدنيا ياريت متقوليش عليه كدا تاني عشان دي حاجه بضايقني.
يبقي برد عنه العيب و بدافع و ببين للي قدامي اني رافضه الكلام اصلا عشان ميستظرفش تاني و يكرره طيب البعيد جبله و كرر الكلام تاني. انا كمان هبقي جبله عادي جدا و ابتدي اوقف الي قدامي عند حده.
-اعتقد اني قلت اني مبحبش الهزار من النوع ده فين المشكله في ده؟

-من فضلك اخر مره تقولي علي البنت كدا لاني مابسمحش لاي كلام سلبي عليها قدامي
-ياريت كل واحد يخليه في حاله لان دي قله ذوق.
بمنتهي البساطه امنعوا التنمر عن أولادكم هيحسوا انكم السند و الضهر و هتزيد ثقتهم في نفسهم و الكل هيعملك الف حساب و يفكر الف مره قبل مايقول اي كلمه علي ولادك .

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى