اه لو ارضك تحكى قد ايه
خطوات داست عليها
اد ايه حكايات حصلت فيها
اه لو قالت مين سكنها
ومين عايش فيها
مين زارها و مين عشقها
ومين بنى ليها
مين بحر بمراكبها
دندن بمواويلها
ومين علا صوته و ثار فيها
وكره عدويها
اه لو تفهم اغانيها
لو فتحت قلوب ولادها
ح تلاقيها فارشة حب
و قاعدة فيها
اه لو شفت دلعها
لو شفت قسوتها
لو دقت حنيتها
لو دخلت جنتها
ح تنسى اللى بعديها
الدرويش فيها فيلسوف
مآذنها كتيرة بالالوف
و كنايسها جنب الجوامع جيران
وللآن هى ام لكل انسان
لو حضنت و لا ملصت الودان
ح تدوب فيها
اللى بيشتكى منها حب
و اللى بيدافع عنها حب
واللى هاجرها عتاب
واللى عاد ليها عذاب
شافه من بعديها
مهما حصل منها
و مهما حصل فيها
بنغنى شاكينها
ونغنى حبينها
و نغنى عايزنها
حكاية عايشنها
وقصة كتبنها
للعالم تبتدى منها
وتزود عليها
لكن هى البداية
وهى النهاية
وفاضلة معايا
بقلم راندة محمود
