رحلة البحث عن الذات
كتبت / دعاء التوني.
الحلقة الاوله: انا مين؟
في يوم عادي جدا…
صحيت من النوم، مسكت موبيلك، و بدأت يومك كأنك عارف هتعمل ايه.
نفس الروتين، نفس الوجوه، نفس الكلام.
بس وسط كل ده….
سؤال بسيط ظهر فجأة:
انا مين؟
مش اسمك، ولا شغلك، ولا دراستك…
انا مين بجد؟
السؤال ده يمكن بييجي في لحظات هدوء نادرة، أو في وقت زحمه، وانت سرحان وسط الناس، أو حتى قبل ما تنام بدقايق…. لما كل حاجة تسكت.
وفجأة تكتشف إنك عايش حياة…
مش متأكد إذا كانت اختيارك، ولا مجرد طريق مشيت فيه و خلاص.
بنعيش سنين طويلة بنجري…
ورا توقعات الأهل،
ورا صورة مثالية رسمها المجتمع،
ورا نجاح شبه اللي بنشوفه على السوشيال ميديا.
نقارن نفسنا بالناس،
نحس إننا متأخرين،
أو إن في حاجة ناقصة…. بس مش عارفين هي إيه.
و الحقيقة الصعبة؟
إن أغلبنا ما أخدش وقت يسأل نفسه السؤال ده بجد.
احنا بقينا نسخ متكررة….
نسخة اتربت هلى أفكار معينة،
وخافت تخرج بره اللي اتقالها إنه “صح”.
لكن…
في صوت صغير جوانا، مهما حاولنا نتجاهله، بيظهر كل شوية و يقول:
” دي مش أنا. ”
الصوت ده مش ضعف، ولا شك، ولا حاجه تخوف.
ده بداية
بداية رحلة صعبة شوية..
