كتبت/امل ابو العلا
فى ناس عايشة طول عمرها بتسأل:
“أنا ليه مش مرتاح؟”
مع إن الإجابة بسيطة…
أنت مركز مع نفسك زيادة عن اللزوم.
كل تفكيرك:
أنا عايز… أنا محتاج… أنا تعبت… أنا مش مبسوط…
بس عمرك جرّبت تسأل:
مين محتاجني أنا؟
الغريب إن الإنسان…
كل ما يزوّد اهتمامه بنفسه، بيحس بفراغ أكبر.
وكل ما ينسى نفسه شوية عشان غيره… بيتملي.
مش عشان هو ملاك…
لكن لأن ربنا بيبدّل القلوب اللي بتدي،
بقلوب مرتاحة حتى وسط التعب.
أنت فاكر إنك لما تساعد حد…
بتعمل له معروف؟
الحقيقة؟
أنت بتعمل معروف لنفسك قبل أي حد.
لأن في يوم من الأيام…
هتلاقي اللي بيقف جنبك من غير ما تطلب،
وهتستغرب: “إيه اللي جابه؟”
وهيبقى الجواب بسيط:
“أصل إنت كنت سبب في راحة ناس كتير… فربنا بعت لك اللي يريحك.”
… أنت مش محتاج معجزة،
أنت محتاج تبقى معجزة في حياة حد.
مش كلاللي بتعمله بيرجع لك فورًا…
بس كل حاجة بتترد…
بطريقة تخليك تقول:
“الحمد لله إني كنت بعمل
خير.”
