” قلب مفتوح ”
بقلم ️ / خالد مصطفى
النفس المفتوحة … دي رزق من ربنا .
في نعمة كبيرة كتير مننا مش بياخد باله منها وهي إن نفسك تكون مفتوحة .
نفسك مفتوحة إنك تصحى من النوم ، إنك تبدأ يومك ، إنك تقوم تفطر ، تلبس، وتنزل شغلك .
نفسك مفتوحة إنك تشوف الناس وتتكلم ، وتضحك ، وتشتغل ، وتفكر ، وتتعامل .
اللي عنده النفس المفتوحة دي ، عنده طاقة خفية بتخليه يعيش اليوم كله بخفة وفرحة ، حتى لو فيه تعب أو ضغط أو مشاكل عادي مفيش مانع .
النفس المفتوحة دي مش مجرد حالة مزاج ولا صدفة ، دي رزق من ربنا فعلا ، ومحتاج تحافظ عليه وتشكره عليه .
لأن لما النفس بتتقفل كل حاجة بتبقى تقيلة .
تصحى من غير نفس ، الأكل ملهوش طعم ، الشغل بيبقى عبء كبير ، والناس تبان كلها وحشة ، واليوم يعدي تقيل وكأنه سحابة سودا ملهاش نهاية .
لكن لما النفس بتكون مفتوحة ، الدنيا كلها بتحس إنها دنيا منورة ، حتى أبسط الحاجات بتبقى أحلى وأجمل ومليانة معاني طيبة .
في عوامل كتير تساعدك إن نفسك تفضل مفتوحة .
أول حاجة النية ، إنك تصحى بنية حلوة وتقول “يا رب يومي يكون كله خير وبركة”.
النية دي بتغيّر إحساسك باليوم من أول دقيقة ،
تاني حاجة الامتنان والشكر والرضا ، إنك تبص حواليك وتشوف الحاجات اللي عندك ، مهما كانت بسيطة ، وتشكر ربنا عليها .
اللي بيشكر ربنا دايمًا ويحس بكرمه وفضله عليه نفسه دايما بتفضل مفتوحة للدنيا ، لأنه حاسس إن في خير حواليه مهما كانت الظروف مش في أحسن حال .
وثالث حاجة التوازن النفسي ، لأن اللي بيستهلك نفسه زيادة ، أو بيضغط عليها طول الوقت ، طبيعي بعد شوية نفسه تتقفل من كل حاجة وكأن الرصيد خلص أو شحنة الطاقة الإيجابية النابعة من القلب أنتهت .
متبخلش على نفسك وارتاح فعلا وقت الراحة ، واشتغل وقت الشغل ، ومتنساش راحة الضمير اللي لها مفعول السحر مع أي إنسان .
و الصحبة كمان ليها تأثير كبير .
لما تكون حواليك ناس بتحب الحياة ، ناس بتضحك من قلبها في وشك مش من وراك وبتشجعك وتدعمك وقت اليأس والإحباط وبتسمعك لما تكون محتاج تتكلم وتنصحك بصدق مش بغرض المصلحة .
لكن لو حواليك ناس سلبية ، بيشتكوا على طول الوقت ومش شايفين غير السواد والانانية والمصلحة ، طبيعي النفس تتقفل وتختنق وتكره أنهاحتى تصحى من النوم .
وفي الآخر ، الإيمان هو المفتاح الكبير .
الإيمان إن كل يوم جديد بتتولد معاه فرصة جديدة ، وإن اللي راح مش نهاية العالم ، واللي جاي ممكن يكون أحسن بكتير .
الإيمان ده بيطمن القلب ويفتح النفس مهما كانت الدنيا صعبة .
اللي عايش بنفس مفتوحة ، بيعيش حياة أبسط بس أجمل ، وأقرب للرضا .
واللي نفسه مقفولة بيحس إن كل حاجة ضدّه حتى لو مش حقيقة .
وعشان كده لازم تحافظ على نفسك و على طاقتك و على سلامك الداخلي .
خلي قلبك دايمًا شاكر ، ونظرتك للحياة فيها أمل ، وساعتها هتكتشف إن النفس المفتوحة مش بس رزق…
دي أسلوب حياة وقلب مفتوح على كل الدنيا .
