عندما باع الفنان فريد شوقي عيدان قش القمح على انها شفاطات في كافيهات وبوفيهات السينما قبل أن يكون ممثلا
متابعه/غادة إبراهيم
الحكايه رواها الاعلامي وجدي الحكيم على لسان الفنان فريد شوقي ٠٠ قال فريد شوقي
انا كنت أعمل مهندس في مصلحة الأملاك المصريه وفي يوم خرجت علشان اقيس أرض زراعيه في بلد اسمها شبرا النمله وكنت راكب حصان وورايا القايس واحنا بنقيس الارض مثلا ١٠ او ١١ فدان بنحطهم على الخريطه ونقول الحد البحري كذا والحد الغربي كذا وكانوا يقولولي الحد البحري مثلا ١٠٠ متر ومزروع ملوخية وانا ماكنتش اعرف اصلا الملوخيه من البرسيم واصلا انا كاره ابقى مهندس وكاره الشغلانه دي لاني اناعايز ابقى ممثل المهم لقيت الفلاحين بيحصدوا ويجمعوا القمح والقمح عباره عن سنابل وعيدان والعيدان دي بيعملوا منها تبن علف للمواشي وكان الفلاح بيبيعوا بالحمل على الجمل فسالت الفلاح بقوله بتبيع الحمل بكام
قال لي ب٢جنيه رحت فكرت كده ورجعت بذاكرتي لورا وافتكرت اني كنت مره في سينما رويال وكنت طالب ازازة كازوزا سبايس كانت مشهوره في وقتها وحلوه
أيامها وطلبت من البوفيه كبايه
بتاع البوفيه قال لي لا يابيه الكوبايات بتتكسر الانجليز بييجوا يسكروا
وبيكسروها
قلت له طب اديني شاليمو ٠ يعني شفاط بلغتنا ٠ قال لي مفيش قلتلو ليه قال لي علشان بنجيبها من بره واحنا في حالة حرب والاستيراد واقف الكلام ده كان سنة ١٩٤٥ قمت رجعت على عيدان القمح وهما بيقصوها خدت عود كده لقيت طوله ييجي متر او ٩٠ سم ماهو ده ممكن يبقى شفاطه رحت للفلاح وقلت له تعالى انا هاخد منك الحمل ب١٠جنيه قال لي معقوله يابيه قلتلوا ايوه بس بشرط العود يفضل سليم وميبقاش مفعوص ولا مكسورعلشان كده هدفع ١٠جنيه قال لي امرك يابيه حاضر وفعلا الراجل ماخيبش ظني وانا كنت ساكن وقتها مع والدي ووالدتي في بيت العيله وهمه مايعرفوش انا بعمل ايه وابص الاقي جملين محملين قش والعيال ادامهم بيروهم البيت فوالدي بيقولي ايه ده قلتلوا يابابا انا هعمل مشروع هايل
وكان عندنا فرانده كبيره فنزلت خدم البيت والراجل الجمال وطلعوا القش وحطوه فيها وكانت هي نفس الفرانده اللي والدي بيقعد فيها ويشرب قهوته كل يوم العصر وبسرعه نزلت على حته اسمها سوق الكانتو وده سوق للحاجات القديمه ورحت اشتريت ١٠ مقصات وجبت شوية عيال من الحاره وقلت لهم شوفوا ياولاد العود ده عايزه يتقص ٣ حتت والي هيعل ١٠٠٠ عود هديله نصف فرانك ٠ النصف فرانك تعريفه او ٥ مليم كانوا يقولوا عليها نصف فرانك العيال فرحوا وكل عيل بقى يقطع من ٥٠٠٠ إلى ٦٠٠٠ عود في اليوم وبعد كده رحت على مكان اسمه بين السورين ناس هناك بتعمل علب ورق اتفقت مع راجل يعمل ١٠٠٠ علبه وحطيت في كل علبه ١٠٠٠ شفاطه وبعد شهر ونصف رحت سينما رويال وناديت على الجرسون وقلت له ادينا كازوزه سبايس وقلتله اديني كبايه الكلام اللي قالوا قبل كده قالو تاني قلت له بعدين بقى هو انا كل ماجي تقول مافيش مافيش روحت مطلع من جيبى واحدة شفاطه قعدت اشرب الكازوزه بيها والناس اللي حواليه في البوفيه بيتفرجوا عليا مندهشين وقالوا للجرسون هات شفاطه زي دي قال لهم ماعنديش وقال لي بتجيبها منين قلت له دي شفاطات بتتعمل في مصر ليه بتقول من بره وهي بتصنع عندنا
تاخد الالف بكام قال لي ب٣٠ قرش الالف دول كانوا بيكلفوني ٥ قروش و٥ مليم بعت ليه ١٠٠ صندوق دفع ليه ٣٥ جنيه في وقتها
بعد يومين لقيت تليفون من سينما ديانا انت الاستاذ بتاع الشاليمو
واتعرفت وبقيت فريد شوقي بتاع الشفاطات وكسبت في شهر ونصف ٧٥٠ جنيه وكان مرتبي في الحكومه وقتها ١٢ جنيه
رحم الله الفنان فريد شوقي ورحم الجميع
