عندما تسقط الأقنعة
أ/برديس رزق
أخصائي نفسي إكلينكي
عمرك سألت نفسك أنا مين بجد؟
ولا اتعودت تلبس وش غير وشّك الحقيقي؟
فيه ناس بتصحى من النوم تلبس هدومها وتلبس معاها قناع
مش بيساعدها تعيش بالعكس بيخليها تختفي القناع بيحميك بس بيبعدك عن حقيقتك وكل ما كنت بتحاول تهرب من وجعك
كل ما بتلاقي نفسك لابس قناع جديد.
تعالى أقولك انواع الأقنعة اللي ممكن تكون لابسها دلوقتي
وإنت مش واخد بالك.
قناع القوة
يظهر جامد ومافيش حاجة بتأثر فيه مثال شاب فقد حد غالي وبيقول مافيش حاجة تهزني جواه وجع سايبه يأكله لوحده
قناع الضحية
حاسس إن الحياة كلها ضده
مثال شخص بيقول أنا مدمن عشان الناس آذتني بس ما بيحاولش يتعافى.
قناع الهزار
يضحك ويهزر دايمًا علشان محدش ياخد باله من وجعه.
مثال شخص بيضحك على كل حاجة بس في أوضته مش قادر يواجه نفسه
قناع المثالية
لازم يكون شكله وتصرفه وكل حاجة فيه 10/10.
مثال شخص بيعيش ضغط يومي عشان يظهر أحسن نسخة بس بيتكسر من جوه لو فشل
قناع اللامبالاة
بمعني مش فارق معايا أي حاجة
بس هو من جواه فارق معاه كل تفصيله.
مثال مدمن يقول أنا حر أعمل اللي عايزه بس هو بيهرب من مواجهة نفسه.
قناع العارف كل حاجة
بيرفض يسمع أو يتعلم من حد.
مثال مدمن جديد فالتعافي يفتكر نفسه مش محتاج حد وبعدها ينتكس.
قناع المنقذ
عايز دايمًا ينقذ الكل علشان يحس إنه له وجود
مثال واحد بيحل مشاكل الكل وناسي وجعه اللي بينزف جواه.
قناع الروحاني الزائف
يبان إنه متدين أو متزن بس بيستخدم ده للهروب.
مثال شخص في التعافي يتكلم كتير عن ربنا بس ما بيواجهش عيوبه بصدق.
قناع الشخص اللطيف دائمًا
ما بيعرفش يقول لأ وما يحبش يزعل حد.
مثال شخص بيتعب نفسه علشان يرضي كل الناس وينسى نفسه خالص.
قناع الانشغال الدائم
دايمًا مشغول عمره ما يسيب وقت لنفسه.
مثال واحد يشتغل طول الوقت مش علشان ينجح بس عشان يهرب من مشاعره.
قناع العقلانية الزايدة
يحوّل كل حاجة لكلام منطقي ويرفض يعترف بأي مشاعر.
مثال واحد خسر شخص بيحبه ويقول اللي حصل قضاء وقدر من غير ما يدي نفسه فرصة يحزن.
قناع التحكم والسيطرة
لازم كل حاجة تمشي على مزاجه علشان يحس بالأمان.
مثال مدمن متعافي يراقب كل تفصيله لأنه بيخاف يرجع لنقطة الصفر.
قناع الغموض والانغلاق
ما بيحكيش ما بيفتحش قلبه عايش في عزلة.
مثال شخص في جروب ساكت على طول ورافض أي مشاركة لأنه بيخاف الناس تشوف حقيقته.
قناع الشخص الناجح طول الوقت
يعيش عشان يحقق إنجازات بس من جوه حاسس إنه فاضي.
مثال شخص عنده شغل وفلوس بس لما يقعد لوحده يحس إنه مش موجود أصلاً.
قناع اللي بيكابر على الوجع
يقول أنا تمام بس ملامحه وصمته بيصرخوا.
مثال واحد فقد حبيب ويضحك ويخرج بس بينه وبين نفسه بيموت بالبُطء.
الماسك بيحميك من نظرات الناس
بس بيخليك غريب عن نفسك.
القناع هيبعدك عن كل علاقة حقيقية.
اللي بيواجه نفسه بيشيل القناع
واللي بيشيله بيبدأ يعيش.
