١٥ رمضان….سيدنا نوح. كتب اللواء /جمال رشاد
نوح هو الحفيد التاسع أو العاشر لآدم وربنا ارسله بعد ادريس ، وذكر اسمه في القرٱن ٤٣ مرة
وإذا كان ٱدم هو ابو البشر الاول…..فنوح هو الأب الثاني للبشر بعد نجاته من الطوفان العظيم .
مراجع كتير قالت ان احداث طوفان نوح حصلت في منطقة بلاد ما بين النهرين اللي هي الأرض مابين نهر دجلة ونهر الفرات في العراق .
ربنا أرسل نوح لقومه لمدة ٩٥٠ سنة يدعوهم لعبادة الله ، لكنهم رفضوا دعوته وتوعدوه بالرجم هو واللي ٱمن معاه، بل وكانوا بيعتدوا عليه أحيانا بالضرب لغاية ما يغشى عليه ولما يفوق يقول : ” رب اغفر لقومي فإنهم لا يعلمون ” .
قال ابن عباس : ( إن نوحا كان يضرب ثم يلف في لبد -صوف- فيلقى في بيته يرون أنه قد مات ، ثم يخرج فيدعوهم)
ربنا أمر نوح ببناء سفينة،وقيل ان نوح كان يزرع الشجر وينتظر يكبر ١٠٠ سنة وينشره عشان يطلع منه خشب للسفينة،وانه دهن باطن السفينة بالقار، وعمل فيها ٣ طوابق، الأرضي للحيوانات والوحوش، والثاني للإنسان والثالث للطيور، وفوقها سقف مقفول عليها .
ربنا أوحي لنوح بأن علامة بدءِ الطوفان هو فوران التنور…….ايه هو التنور اللي حيفور ده ؟؟
بعض التفاسير قالت انه انفجار بركان في المنطقة، وفيه تفسير تاني قال انه انغمار الارض بالماء لان العرب كان بيسموا وجه الأرض بتنور الأرض .
واتقال كمان ان فوران التنور هو طلوع نور الفجر
واتقال ان التنور عبارة عن فرن صغير يدوي كان يخص السيدة حواء ووصل لنوح وكان بيستخدمه.!!
المهم…..لما اتحققت العلامة بتاعة فوران التنور نوح أمر أهله يطلعوا علي السفينة لكن زوجته واغلة وابنه كنعان اللي كان عامل نفسه مؤمن رفضوا…..أما اولاده الثلاثة المؤمنين سام وحام ويافث (اللي احنا جينا من نسلهم) ركبوا معاه ومعاهم قلة من المؤمنين.
قال ابن عباس: «آمن من قوم نوح ثمانون إنسانا».
ومعاهم كمان من كل دواب الأرض زوجين.
بالمناسبة…مكان بناء السفينة كان علي ارض صحراء بعيد عن اي بحر او نهر وده سبب سخرية قومه منه.
لما انتهي من تحميل السفينة، انفجرت الأرض عيون مياه كتير جدا وفتحت السماء ابوابها لأمطار غزيرة وبدأت السفينة تتحرك وسط أمواج زي الجبال يقال لمدة ١٥٠ يوم .
وهلك قومه الكافرين ويقول ابن عباس ان نوح أرسل بعد مدة من إبحار السفينة حمامة…. طارت ورجعت له تاني علي رجليها طين وفي منقارها غصن زيتون،فعرف منها ان ربنا أمر الماء انه ينحسر وانه يقدر يرسي وان الأرض قربت تظهر له.
((وَقِيلَ يَا أَرْضُ ابْلَعِي مَاءَكِ وَيَا سَمَاءُ أَقْلِعِي وَغِيضَ الْمَاءُ وَقُضِيَ الْأَمْرُ وَاسْتَوَتْ عَلَى الْجُودِيِّ ۖ وَقِيلَ بُعْدًا لِّلْقَوْمِ الظَّالِمِينَ ))
ويقال ان الجودي هو اسم الجبل اللي استقرت عليه السفينة يوم العاشر من المحرم يوم عاشوراء وان نوح أمر اللي معاه بصيام هذا اليوم .
ولغاية دلوقتي محدش قدر يوصل للموقع الحقيقي للسفينة رغم ان ربنا قال :
((ولقد تركناها آية فهل من مُدَّكِر))
بعض العلماء قالوا ان ٱثار السفينة في تركيا قرب (جبل أرارات) وفعلا من شهر تقريبا بعض العلماء اعلنوا انهم توصلوا لأدلة تؤكد عثورهم قرب الجبل ده على بقايا سفينة النبي نوح اللي أنقذت البشرية من أكثر من 5 آلاف سنة من الطوفان الكبير اللي ضرب الأرض، وذُكر في القرآن الكريم، والإنجيل، والتوراة. والله أعلم طبعا
ويبقي سؤال مهم…هل الطوفان ده كان علي كل الأرض ولا منطقة معينة؟
المسألة دي تعتبر موضوعُ نزاعٍ بين أهل الأديان وخلافٍ بين مؤرخي الأمم، لكن أهل الكتاب وعلماء الأمة الإسلامية قالوا ان الطوفان كان علي عموم الارض واستشهدوا علي ده بالعثور علي الأصداف والاسماك المتحجرة فوق قمم بعض الجبال.
وخلينا نركز في كلام نوح في الاية دي:
﴿رَّبِّ لَا تَذَرۡ عَلَى ٱلۡأَرۡضِ مِنَ ٱلۡكَٰافِرِينَ دَيَّارًا﴾
هو هنا يقصد أي أرض؟
هل الأرض اللي هم عاشوا فيها بس ولا الارض كلها؟
وكمان ربنا قال :
((لَا عَاصِمَ الْيَوْمَ مِنْ أَمْرِ اللَّهِ إِلَّا مَنْ رَحِمَ))
وقال(( فَفَتَحْنَا أَبْوَابَ السَّمَاءِ بِمَاءٍ مُنْهَمِرٍ * وَفَجَّرْنَا الْأَرْضَ عُيُونًا ))
يعني الأرض بقت كلها عيون!!!
كده اعتقد ممكن نرجح تقريبا ان الطوفان اجتاح العالم كله.
يتبع ……
