رمضان راح
راندة محمود
رمضان جانا………. .
……… رمضان راح
رمضان طبطب ع الجراح
رمضان ندانا
مين معانا ؟
و مين راح؟
مين جاي لحد العيد؟؟
مين اشترى اللبس الجديد؟
مين حضر الكحك بالعجوى؟
مين زار الأهل و العزوة؟
أو حد زاره على سهوا؟
مين خرج و اتفسح؟
ولعب و اتمرجح؟
وآخد العدية؟
قولت له العيد السنة دي
مش ليا
راحت ضي عنيا
وسيبالي طرحة وجلابية
وضحكة مطبوعة ف خيالي
و بوسة أخيرة
ع الخد ادتهالي
وبسكوتة قسمتهالي
حطت نصها ف بوقها
والباقي اكلتهالي
ولزقة بتحطهالي
لما كنت بتعور
وفرخة ربتها ف المنور
تسألني عنها
كل ما تروح عن بالي
ورجل كرسي مكسورة
زي قلبي اللي انكسر
أمي يا دوب بقت صورة
ولسه بتسأل عن حالي؟
وتقولي عيد؟
أكيد يا عم بتهزر
