بسم حزني و ياما بحزن …… باسم حرماني ل حنانك
الجواب ده ليلاتي دايما ……… بكتبه ب قلبي عشانك
من حبيب قلبك و ضلك …… من ضناك أبو حزن خام
أيوه هكدب لو هقولك ……………… إن أنا بعدك تمام
قالوا ليه الشوق يحللي ………. القلب و يخليه سعيد
و انت ليه شوقك تمللي ………. زي خنجر في الوريد
ياللي كنت بعيش ب سيرتك ….. و ابتسم أنا و الزمان
اللي ع الحيطه دي صورتك ……. بس فينك من زمان
فين وجــودك وسط لمـه ………. مش بتحلو إلا بيـك
فينها ضحكــــة قلبي لما ……. تيجي و تطبطب إيدك
قوللي راجـع قوللي هاجي .. وابقى جنبك وابقى ليك
سبتني ف عز احتياجي …. ل ضمتك و حنان عينيك
ياللي من إسمك حروفي ……. ياللي من دمك حياتي
سبتني بتهجى خوفي ……. و احضن الاحزان ليلاتي
ما انت كنت سنين جميله .. عايشه تسعدني وخلاص
كنت أب و بيت و عيلـه …….. كنت دنيــا ملانه ناس
تايهه من بعدك سنيني ……… و الزمان ماسخ حزين
في الختام يا ضي عيني ……… عـاوز أقولك كلمتين
مش هاتهدى فيوم جراحي ….. مش هتشفع ذكريات
أنت عشت ف قلبي صاحي … و قلبي بعدك يابا مات
.
.
الشاعر اللواء محمد هيكل
