غاب….
معقولة الدنيا لسه ماشيه
وانت مش فيها
معقولة الشمس الصبح بتطلع
والقمر بالليل بيرجع
ينور شوارعها و مبانيها
طب ليه الوقت عندى فى غيابك
ما بيتحركش
ليه الدنيا وقفت لما نورك
ما بيظهرش
ليه قلوبنا واجعانا
وانت متعرفش
ليه عقولنا سهيانا ما بتفكرش
جينا عندك نحكيلك وجعنا فى غيابك
فاكرينك و احنا كنا على بابك
تاخدنا فى حضنك و تطبطب على كتافنا
كنت حافظنا و اكتر حد يعرفنا
مين دلوقتى ح نشكيله و ينصفنا
مين ح يهون و يخفف مواجعنا
كنت سندنا و ضهرنا
ولما رحت.. ضعفنا كشفنا
فاكرين الضحكة اللى ساكنة فى عيونك
الراحة الهادية فى سكونك
فرحة قلبك لما تشوفنا حواليك
الحاجة الحلوة اللى فى ايدك مش ليك
لونت ارضنا و سمانا بلونك
لمتنا لك بتشتاق..بتستناك
فسحتنا برضه عايزاك…ومش لاقياك
ضحكتنا العالية بقت ابتسامة
ومش بتظهر ياما
ويا دوب مرسومة ع الشفايف
بتخدع يعنى اللى شايف
قال ايه بنضحك
ضحك زايف
ٱمال ليه فيه دموع ع الخدود
عارفين ما حدش كبير ع الموت
ولا فيه عزيز ممكن يفوت
لما بيجى الميعاد بينادى الف صوت
كان لسه معانا بيشجع م الماتش
آخر شوط
بيرسم معانا للمستقبل خطوط
بيجرى فى وسطنا ع الشطوط
لكن عذرنا انه لما راح
حزن عليه الشجر
حزن البشر
حزن الحجر
اتملت الروح جراح
كتب الزمن سطور
ونادى اهل القبور
فيه عندنا عابر
م الدنيا لأحلى جنة
والقلب لربنا صابر
بندعي ربنا يعينا
ع اللى مستنينا
لحد ما نتقابل
ح نتحايل ع الوداع
ونشيلك ف قلوبنا
و عيونا ح تساع
ذكريات لا بتتشرى
ولا تتباع
راندة محمود
