من ساعة ما عرفتينى….وانا مغلبك
بازهق لما تكلمينى كتير….ازعق و سكتك
لما اشوفك مع حد و اغير…..ازعل و اعذبك
ولما تنجحى و تسبقينى….بقف فى سكتك
يا تسيبى الشغل يا تسبينى
كنتى توطى راسك تخفى دمعتك.
….وتختارنى
خيوطك كلها فى ايديه…ما تشميش نفسك عليه
مسموح لك بس تكونى ورايا و ترفعينى
بحذرك يوم ما ح تزعلينى.
…ح اروح لواحدة تانية
خافى بقى منى
لكن لما قطعتى كل خيوطك من ايدى
وقلتى لى نفد الرصيد اللى لك عندى
ما عاد فى شئ مطمنى
كأن حد صحانى م النوم مفزوع
عايز ارجع م الاول اصحح المعاملة
اكلمك فى اليوم الفين مكالمة
اخدك فى حضنى وتمشى جنبى مش ورايا
لكن للاسف مفيش رجوع
اتقفل الموضوع
خلاص بقيتى مع غيرى مش معايا
راندة محمود
