ساعات
راندة محمود
ساعات بحس قلبى مش راضى
بحس ان جواية فاضى
مفيش حاجة تملاه
بحس ان حياتى مأساة
ان تفاصيل حياتى كوميدية
من نوع شر البلية
وان الضحكة غريبة نوعا ما
ولما ابقى سعيدة بستغرب
ويجى فى بالى خير يا رب
اكيد ح تقلب حزن وكرب
بحس ان على ذنب
او عمل و تعمل ليا
ان ابقى مش طبيعية
ان نفسى تكون غريبة عليا
وساعات احضن الدنيا
واحضن الناس اللى فيها
وأعيش الحياة اغنية
واطبطب على روحى و اراضيها
ومحبش اللى يعيب فيها
كأنى عايشة فى قلب حدوته
كأنى جنية محطوطة
جوه مصباح بألف جناح
يطير سواح ويبقى جواه مخطوطة
وابقى انا الكنز والجزيرة و الخريطة
وابقى اهم مانشيت فى الجريدة
ابقى محطة دنيتى الجديدة
ابقى بجد…بجد سعيدة
وانا بين الساعة ديه
والساعة ديه
راضية ومرضية
