بنتى جاية واتخبت فى حضنى
باصة فى عنيا وعينها ماليها الخوف
بتفتح بوقها و تقفله
مش عارفة ده ترددولا كسوف
قلتلها قولى فهمينى
وافهمى منى
بصت لى تانى ونزلت عينها
بصة فى حجرها
حاسة بيها وبنبض قلبها
قلت لها قولى يا بنتى اعملى معروف
قالتى يا امى الدنيا وسعت عليا
زمان كانت دنيتى انتى
تغنيلى تعلمينى شوية حروف
وسعت دنيتى حبة بقت مدرستى
مدرستى وصحاب البراءة
اللى لحد دلوقتى ماسكين فيا
رغم الظروف
ببص ف صورهم لقياهم شبهى
نظرة عنيهم نفسها عنيا
قارين دماغى فهمنى
دلوقتى اللى عرفاهم مش نفس تربيتى
اللى انتو عليها مربينى
الحاجات اللى قولتولى غلط
بيعملوها مش بايدى
الحاجات اللى قولتولى مبادئ
بيقولوا عليها عبط
بيناقشونى ويعاندونى
ومن الشلة بيطردونى
انا خايفة يا امى
انا لوحدى فى وسط كتير
بتقوليلى ما تخافيش
خايفة اصحى فى يوم و معرفنيش
خايفة اتوه بين الصح اللى اعرفه
وبين الصح اللى ما يعرفنيش
خايفة ما اقدرش اعيش
دخلت تانى فى حضنى
ايديها حوطتنى
قالت لى والنبى يا امى
خلينى هنا ما طلعنيش
قولت لها تانى متخافيش
فى كل وقت و كل نهار
فيه السابحون ضد التيار
انتى صاحبة الاختيار
مش عشان كتير
يبقى حقهم ياخدوا القرار
ويقلبوا الشر خير
ويقولوا ع الطيبين اشرار
قودى ثورة الاحرار
اللى واثقين من مبادئهم
كونى شرارة التغيير
كونى سيدة الميزان
اللى مغمية عنيها مش بتخاف
لو خسرت قضية عندها اسئناف
خلى فى خطوتك اتزان
املى قلبك بالايمان
خليكى فى ثقة اللى شاف
مش اللى اتحكى له
مش اللى خطر شئ على باله
قام عملوه من غير تفكير
خليكى مركز اللمةذات الهمة
خليكى لوحدك امة
راندة محمود
