كحك العيد
نقشة وكحكة
لمة و ضحكة
فرحة و حركة
ع الطبلية
فى وسط بناتها
لمة الجلابية
ولا مهتمية
عايشة حياتها
من عاداتها
تاخد الجمعية
وتجيب طلباتها
تلم اخواتها
دى الكبيرة أم الحنية
بالمناقيش
تنقش دنيتنا
الاميرة ام الضفيرة
استنتنا
هى اللى علمتنا
يعلى صوتها كل شوية
اعملى دى وشيلى ديا
ولا على اديكى نقش الحنة
يالا بسرعة
لا حد يجيلنا
تدور بينهم تراقب
ظابطة م الساعة العقارب
على يوم العيد
هو أنا لازم اقول و اعيد
العيد فاضل عليه ايام
لازم كله يبقى تمام
ما عملناش لسه البسكوت
ولا عملنا حبة بتى فور
خليتوا اعصابى تفور
يالا تعالوا كلولكم لقمة
على ما قوسم
يا دوب مسح زور
ويوم العيد
تعيد ع القرايب
و ع الجيران
وتدق الابواب
اطباق متغطية
ولقمة هنية
وكفت ميه
وهى …….. 
ما طلعلها مناب
لا خدت بلح اليمن
ولا عنب الشام
لكن فى كل عام
بتعد الشهور و الثوانى
بتقعد نفس القاعدة
و تعبى بالكحك الصوانى
قعدت هنا الجدة
وعلى نفس الطبلية
قعدت الأم
والنهاردة كنتى أنتى
وبعد عمر
ح تيجى بنتى
ونعيش الفرحة بزيادة
يا رب ما تنقطع لنا
………………..عادة
راندة محمود
