شعر وادب

امشى

امشى

استنى ..أقف ..أرجع
ما أنا مش أولد وأرضع
وبعدين تسبنى وحيدة
وسط ناس غريبة
وتبقى عيبة ..
فى وشك
أنا مش ح أغشك
ربنا قال أكبر عندك
النبى قال أمك..أمك
بستحملك و استحمل عندك
وآخرتها بتسربنى
زى قطة مش عايزها
طول عمرى باقولك يا أبنى
بس اتاريك مش حاسسها
طول عمرى فى قلبك ببنى
وانت هديت و برجليك
روحت دايسها
دا أنا كنت بغطيك برمشى
وفى الآخر بتدور تمشى
والنبى ما فى حد حايشنى
ان أرفع ايدي للسما
و أدعى عليك
غير قلبى هو موغوشنى
لا الدعوة تصيب فيك
امشى يا بنى روح شوف حالك
انا مهما اعيش مش باقية لك
بس خليك عارف داين تدان
احفظ رقم أوضتى يا غلبان
عشان لما تدوربيك الايام
وعيالك يجبوك عندى هنا
ابقى اسكن فيها
ح أسيب على الحيطان
رسايل و كلام
واكتب لك حكايات تسليك
اصل وانت وحيد يا طول لياليك
واسيب لك اغانيك
اللى كنت بتحبها وانت صغير
يا دوبك ح تعديك
من حسرتك
مش ح تخليك تتحير
ليه انت فى غربتك
ما حدش مستنيك
عشان أمك راحت
ومش راضية عليك

راندة محمود

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى