بقلبى مش بقلمى
راندة محمود
خبا وشه فى حضنى
وقالى ليه انا منبوذ
ليه انتى و ابويا لما تشوفونى
بتضربوا بوز
انا عارف يا امى انك بيه
مش فخورة
ونزلت من عيونه دمعتين
دمعونى
ولما وصلوا لقلبى حرقونى
كمل كلامه و عياطه بقى نهنهة
اكمنى مش شاطر فى الدروس
ولما ودتينى العب كورة
رفضونى بكل عنجهه
وقالولى حالك ميئوس
وفى السباحة دفعتى فلوس
واتعلمتها يا دوب تهتهة
معنديش يا امى موهبه
حتى الصحاب نبذونى
لفيت اديه حواليه
وانا بمسك نفسى
لدموعى يخنونى
قلتله وانا بحضنه قوى
بخبيه من الحزن و الاحباط
كل الحاجات دى ولا يهمونى
يوم ما جتنى انا بس كان نفسى
انك تكون بخير
انت فى عيونى غير
انت عندى زى سفينة نوح
لما عملها بايده و رصها لوح لوح
وكانت النجاة
فى يوم يا روح ما بعدك روح
تخيل ح يحبها قد ايه؟
مهما بنى من بعدها
حتى لو اجمل لو اغلى
مش ح يجى زيها
ولو شوفت على مر العمر يخوت
من فضة او من ياقوت
مش ح توازنها عمرها
لو شوفت غيرها اكبر
مصنوعة من عاج و مرمر
محدش يقدر يحبها
زى السفينة اللى انت زيها
انت مش بس السفينة
انت الارض و المينا
اللى وقفت عندها
انت البلد البعيدة
و البداية الجديدة
اللى بدات منها…
مرة تانية الحياة
انا كنت عاملة زى اللى عاش و تاه
واتسرق منه المال و الجاه
واحنى راسه للالاه
ودعى دعوة صحته انتباه
انت كنت دعوتى
انت كل دنيتى
انت الهبة
اللى الدنيا لها متأهبة
بقلبى مش بقلمى
راندة محمود
