عدى الزمان

عدى الزمان .. قشاش …… بياكل ف السنين
خد منا ياما …… وخد كتير …… م الطيبين
خد ناس جميلة …… و ذكريات مابتتنسيش
و خد معاه ….. اللمه ……… و ليالي الحنين
.
عدى وداس ….. فوق الصـور …. والذكريات
ماسألش مين اللي اتوجع … و ف ثانيه فات
راحوا الحبايب كلهم ……….. مافضلش حد
كل اللي ف الصوره خلاص .. من بدري مات
.
فضيت بيوت .. من زحمة …. الحب الحلال
خليت خصال الخلق ……. من طبـع الرجال
مبقاش بيرمي النخل رطبه ….. ع الجيران
و معدش شجر التوت …….. بيطرح للعيال
.
ساكته الشوارع ………. رغم كونها مليانين
لكن سكوتها ………….. يشبه العمر الحزين
شمس النهار .. مابقتش …. بتدفي الطريق
و الليل .. كأنه .. بينتقم ……. م السهرانين
.
حدوته حلوه … كات تلم ….. و كات تساع
بنوته … عايشه بتتكسف …. بعيون وساع
نسكت ف لحظة … و نفتكر .. نَص الحوار
يسرح خيالنا … و يبكي ع العمر اللي ضاع
.
لف الزمان ….. بينا …. و ورانا …… البدع
دبلت شواشي العمر ….. ف غيطان الجدع
الضحكة باهته ….. فوق وشوش كل الولاد
حتى الدموع …. مابقتش بتريح …. وجـع
.
حاجات كتير .. عدى الزمان فوقها و داس
كان لينا بينهم ……. حب و حبايب وناس
و أدينا لسه مكملين ……… رغم اللي راح
و لا لينا من غيرك يارب الكون …. خلاص

الشاعر اللواء محمد هيكل