بقلم: راندة محمود
انت يا اللى قاعد معايا جوه البيت
لما بكلمك بتبقى مش سامع
عايزة رأيك فى الموضوع
كلامى رايح مش راجع
عينك مشغولة فى التليفون
اقعد طيب و لا اقوم؟
وقفت اهو على حيلى
مش فارقة انا من غيرى
اسمح لى اقولك انت زومبى
ايوه زومبى
صاحبى يا اللى انا وانت قاعدين ع الكافيه
ح نلعب طاولة و لا دومينو
تختار ايه؟
ولا ندردش ف الاحوال
اسألك و تسألنى ع العيال
نتكلم حبة سياسة ولا اقتصاد و مال
الله يكون ف العون
سايبنى و مشغول بالتليفون
اسمح لى اقولك انت زومبى
ايوه زومبى
جارى يا اللى زرتك شوية
خدتنى بالحضن و سلمت عليه
عملت لى كوباية الشاى المتينة
سألتك عن الأهل و العيلة
بايظ اسانسير العمارة
السلالم اللى قدام البوابة منهارة
عايزين نصلح الخزان
ونبنى للسطح سور
نساعد عم سعد الغلبان
لحسن عيان من شهور
انت معايا و لا مع التليفون؟
يالا ايكش يخرب الكون
اسمح لى اقولك انت زومبى
ايوه زومبى
كل اللى حواليه ماشين
بياكلوا و يشربواو عايشين
بس ماتوا من زمان
محسوبين فى تعداد السكان
بس مش موجودين
حياتهم افتراضية
مش حياة حقيقية
ماشى كله يهون
الحال غايظنى
حد عايزنى؟
انا مشغولة ع التليفون
قررت اكون الزومبى المليون
