شعر وادب

.قصيدة أمر خدمة

.

كان أمر خدمه الساعة خمسه الصبح جالنا
ودعنا أهالينا ……………… و طمنا عيالنا
رددنا قسمك يابلادي ………….. بكل عزه
ما احنا اللي من باقي ولادك …. مكتوبالنا
.

الصبح كان لسه يادوب ……… بيهل نوره
كان كل واحد مننا ……….. قايم ب دوره
قلب الوطن .. لوحة شرف .. والكل حالف
يكتب و يثبت للوطن فيها ……. حضوره
.
عملية مش سهله …. و عايزه قلوب عفيه
مايهزهاش ….. ولا أي شيئ ف الدنيا ديا
واحنا إيمانا ……….. ب ربنا و بلدنا غالي
خلانا .. قد القول ………. وقد المسئوليه
.

إيد واحده …… وقلوبنا كانت على بعضنا
و الفرحة ……… كانت باينه ف عنينا كلنا
مهو كل واحد فينا …….. كان عارف أكيد
ل يعيش بطل ………. ل يروح لجنة ربنا
.
مع كل خطوه مننا …… كان صوتها كافي
إنه يقول للدنيا دي ………… لازم تخافي
كان جنبي صاحبي ودفعتي فنفس المهمه
كان ضهره ليا ….. وقلبه كان ساند كتافي
.
إحساسه شجعني ……….. و قواني كتير
و برغم سنه ……. بس كان .. . قائد كبير
رصاصه كان زي المطر .. ونيشانه صايب
تسلم إيديك يا ابني.. اللي تتلف ف حرير
.

انا شوفت قدامي أسد ……. كاتم جراحو
و لمحت فعنيه وقتها …. حق اللي راحوا
الله أكبر تحيامصر .. دي ………. لما قالها
كان صوته أقوى من رصاصي ومن سلاحو
.
وف لحظه جاتلو طلقه.. ف الجنب الشمال
والدم من قلب البطل …… ع الارض سال
نطق الشهاده وقاللي .. حق اخواتي جبتو
غمض عيونه وضمني …. وعلى كتفي مال
.
وصاني على أمه ….. و قاللي ابوس إيديها
قال بابتسامه ف نن عينه …..مش ناسيها
شرف الوطن ….. أغلى قوي من أي حاجه
سلملي على مصر ….. و على كل اللي فيها
.

مع السلامه … يادفعتي …… روح ل الهنا
ف الجنه بيتك ………. و احنا هنكمل هنا
أنا اللي كان نفسي أنولها …واموت شهيد
لكني عشت …….. عشان أجيب حقك انا
.
.
.
كلمات الشاعر اللواء محمد هيكل

مقالات ذات صلة

اترك تعليقاً

لن يتم نشر عنوان بريدك الإلكتروني.

شاهد أيضاً
إغلاق
زر الذهاب إلى الأعلى