بقلم: رانده محمود
بكتب!!! ايوه بكتب
بس ساعات الكلام بيكون
مش مفهوم
بكتب عن كتير هموم
او احداث اليوم
بكتب عن حاجات بالكوم
طب انا بكتب و مين يقرا
مين اللى يستجرا
يقف بس حبة
يشوفنى بقول ايه
كله عايز كلمتين تيك اوى
او عايز يتكلم هو
مش مهم يسمع
مش مهم يفهم الكل يجمع
الكل يتكلم فى نفس الوقت
هو باينه طلع لنا فى البخت
على طول معارض فى حالة سخط
ويبقى مش قابل حد يخالفه
يبقى خلاص برضه مش عايزه
فاكر انه مالوش زى
ودماغ البعيد دى آية
عجباه و مستريحلها
بيحلل كورة و سياسة
نصير الدول المحتاسة
وارائه دى مفيش زيها
يتكلم ف الدين و يفتى
و يعارض اللى يخالفه
حتى لو كان المفتى
المسألة دى محدش قدها
فى وسط العيانين دكتور
مع السياح يبقى ابو الهول
ولو حد اتكلم ف المعقول
يعلى الصوت و يتشنج
انت فاهم حاجة يا شيخ اتبنج
نقطنا يا بنى بسكاتك
و ورينا جمال خطواتك
يقف العم متنك
مش قاعد مع ناس جاهلين
ما أ نتوش فاهمين
يسيب المكان و يمشى
طب ناقش حاور ميعرفشى
بدل ما بيك نتعاير
ساير….الوضع و اقبل الاختلاف
وبدل ما تخاف
اعرف ان الخلاف
لايفسد للود قضية
الخلاف هو اللى بيغنى البشرية
وكلنا فى الاخر اخوة فى الانسانية
