اخويا الغالى
راندة محمود
اخويا الغالي
ضهرى اللى بسند عليه
النعمة اللى ابويا فاتهالى
وتدى اللى مثبتنى فى الارض
حمايتى عنده فرض
انا بالنسبة له شرف و عرض
عمرى كله هو فيه
شريك ذكرياتى الشقية
بيتحمل تصرفاتى الغبية
محامى الدفاع اللى ليا
الاسم الحلو اللى بناديه
خال عيالى
بقولك ايه؟
لو غلطت فى يوم ما تزعلش
لو فى غضبى قلت كلام متصدقش
برضه يعنى تزعل من حبيبك
اللى فى مؤمراتك و انت صغير
كان شريكك
دا انا اكبر مشجع ليك
بطبلك لو كان يرضيك
لو حد فى يوم يعاديك
اكله بسنانى
لو قفلت باب قلبى قدامك
ببقى فتحالك الباب الورانى
اخويا الغالى
يا خال عيالى
اليك البيان التالى
اعرف انى فى اى حرب جيشك
انا الدعوة اللى فى اكل عيشك
انا معاك فى نفس الفريق
انا فرجك وقت الضيق
انا الصاحب اللى بيهون الطريق
انا اللى بعد امك ام
بدعيلك فى خلوتى
ما تشيلش هم
ما يحكمش فيك ظالم
ولا يجرح قلبك ظلم
