زوجي الحبيب
الجـــــــــــــدع
اللي خلي بيـــا
من قلب …… ليلة وجع ……… من بين لياليا
أنا قولت افضفض معـاك واحكي حاجات ياما
دبلت .. ف بعـدك قوي ….. كل الحاجات فيا
.
حاضنه العيـال بعديك ب دموعـي و عواطفي
و انا مهما اكون مطرحـــك مايلـذ يـوم عطفي
كنا بوجـودك ورد ….. و ريحته ماليــه الأرض
الورد .. ده .. و ربنــا … بعدك … بقى مطفـى
.
ساكته الساعات و الوقت .. بيعدي ب صعوبه
و الغربـه من وقتها …. ع البيت ده .. مكتوبه
برد المشـاعر مخيف .. ومفيش لـ بيتنـا وليف
نبقى في عز الصيف ………. وكأننا ف طوبه
.
الدنيـا .. وحشــه قوي … و ناسها …. جراحه
و انت واحشنـا قوي …….. و الوحشه دباحه
مات الحنان بعديك … ومفيش حنين يكفيك
وان كان علينا نجيك … دا الموت معاك راحه
.
ريحتك هنا ف بدلتـك ع الحيـط و ع الشباك
خدت الحياه ف سكتـك و خدت ناسها معاك
القبـر مش تربتـك ……….. القبـر ده .. بيتنا
ماحنا اللي فيك موتنا واحنا اللي موتنا وراك
.
كل اللي كانوا فحياتك مادين خيـوط الوصل
ف ثانيه قلبوا علينا بقوا صورة عكس الأصل
حتى القرايب كلهم ….. و الأهل خانوا العهـد
كل اللي عملوا حبايب بقوا ناس قليلة الأصل
.
حسره ف كل الحاجات والبيت تمللي حزين
و الحزن أقسم يبات .. حزنا .. على الغاليين
كسره ف عين البنات … و عيوني انا بالذات
و اللي راجلها مات .. هتلاقي بخت ف مين !؟
.
كنت انت أب و أخ …. عشرة وصحبه و دم
أصعب جراح الزمن … كانت معاك .. بتـلِـم
حتى ان فارقت الحياه .. وعدى ياما سنين
أنا ليا غير مين ……. يشيـل …. معايا الهـم
.
فاسامحني لو بدوشك ماانت اللي عارف ليه
أصلي اما بحكي معاك .. يهدا الوجع واداريه
أنا إمتى خدت قــرار .. ف الدنيـا من غيرك
أنا إمتى خدت النفس من غير ماشورك فيه
.
زوجي الحبيب الجدع … ماتخفش و اتهنى
ظنك يا سيد الناس … عمــره ما غـاب عنـا
مانت اللي ياما شقيت و على الإيمان ربيت
إحنا وحيطـان البيت … داعينهـا …. بالجنه
.
.
.
الشاعر اللواء محمد هيكل
