…….
____________
سحر ابوالعلا
واقف في السوق
ببيع حلمي
معاه سنيني
و عمري اللي باقي
صحيح انا شكلي على قدي
لكن حلمي و الله كبير
و انا في الدنيا جايز
مملكش حق التغيير
واقف بنادي و لا حد سامع
في وسط الزحمة و ايدي رافع
و بعلو صوتي
حلم يا ناس للبيع
الكل يشاور و بيضحك
باين عليه مجنون
يمين بالله يا ناس عاقل
لا انا مجنون و لا فاشل
انا كل همي مش طايل
اوصل لحلمي و مش قادر
من بين الناس وقف تاجر
شكله كدة فاهم و شاطر
قالّي تبيع حلمك بكام
سكت و قلت مش للبيع
لميت حلمي على سنيني
و عمري اللي باقي
اصل التجارة يا ناس شطارة
و ان بعت حلمي هبيعه بخسارة.
__________________________
سحر أبوالعلا
#السلطانة
