ليه بتحسدهم

ليه بتحسدهم ……. مالك بيهم
مستكتر ليه الفرحه …. عليهم
أكتر ناس …. من بره بتضحك
أكتر ناس ……. الحزن ماليهم
.
ليه توجعهم ……. أو تضايقهم
سيب المخاليق للي … خالقهم
كلنا …. فيه ……. اللي مكفيه
شاغل روحك ليه .. بحكايتهم
ليه بتدور …….. جوه حياتهم
و هتاخد …… من كل دا إيه!؟

لوشفت ف يوم … حد بيضحك
فا دا مش معناه
إن الأيام ……… جايه ف صفه
و الحظ إداه
مش جايز مش عاوزك … تلمح
شيئ يوم خباه
أو جايز …… مش عاوز يصعب
على خلق الله
.
الرزق …… مهوش بإيديك انت
فيه رب كبير
ليك حظ من الدنيا … هتاخده
من غير تفكير
ما تبصش ….. يوم … أبدا للي
ف ايدين الغير
دى الناس أسرار و قلوب الناس
جواها كتير
.
ماتقولش دا ليه فرحان . دايما
و دا حزنه منين
طبطب … بشويش قد ماتقدر
على أي حزين
و ازرع ب ايديك . كلمه تقرب
بين أي اتنين
الدنيا …… بقت صعبه و فيها
جراح بالملايين
.
ليه توجعهم …… أو تضايقهم
سيب المخاليق .. للي خالقهم
كلنا …. فيه …… اللي مكفيه
شاغل روحك ليه .. بحكايتهم
ليه بتدور …….. جوه حياتهم
و هتاخد …… من كل دا إيه !؟
.
ليه بتحسدهم ….. مالك بيهم
مستكتر … ليه الفرحه عليهم
أكتر ناس … من بره بتضحك
أكتر ناس ……. الحزن ماليهم
.

.

الشاعر اللواء محمد هيكل