بقلم/رانيا ابوالعلا
في مرحلة كده اسمها
رضيت بالهم والهم مش راضي بيا
في المرحلة دي بتعمل فيها كل اللي عليك بتسكت وانت نفسك تتكلم وبترضي باللي مش راضي عنه وبتوافق بكل حاجة انت مش بتحبها ومش عجباك وعكس ارادتك بتتنازل عن حقوقك عشان تمشي حالك و بتيجي علي نفسك عشان المركب تمشي
وهي اصلا مركب من ورق
وقصاد كل ده بتلاقي نكران لكل حاجة حلوة عملتها وتطلع مش متشاف اصلا وكأنك ماعملتش اي حاجة كويسة وكل حاجة حلوة عملتها لقيتها اتحولت بقيت عكس ما عملتها مهما عملت مافيش رضا بتعافر في مكان مش مكانك وناس مش عارفة نفسها عايزه ايه اصلا ولا فاهمة معني كلمة الرضا ولا بتشوف الحلو طول ماهو في ايديها
بتصبر وتقول يمكن تحصل المعجزة ،وبتختلف قوة التحمل بين شخص و التاني تصبر ايام او شهور او يمكن سنين كتيرررر وانت مستني وبتكتشف ان عصر المعجزات انتهي
وبتصحي في يوم شخص تاني في مرحلة جديدة
اسمها
اتقي شر الحليم اذا غضب
في المرحلة دي بتكون عكس المرحلة اللي قبلها تماما بتعمل عكس كل حاجة كنت بتعملها بتخرج بره القمقم اللي كنت عايش فيه بتشوف الدنيا بشكل مختلف
بطلت تراضي وتدادي وبتكون نفسك مش حد تاني
بتقوم بثورة من جواك ضد نفسك قبل اي حد نفسك هي اللي جات عليك قبل ما حد تاني يجي عليها نفسك اللي سمحت لك انك ترضي وتسكت في وقت ما كان لازم تقول لا ساعتها بتفوق وبتشوف نفسك بصورة تانية ومش بس انت كل اللي حواليك بيشوفوك حد تاني انت متخيل اللي بيقوم بثورة بيتشاف شجاع و قوي ازاي ما بالك بقي لما انت نفسك تقوم بثورة علي نفسك من اجل الاصلاح والعيش بكرامة وحرية اللي هي اصلا ..ابسط حقوق الانسان
ابدأ بنفسك
غير نفسك قبل ما تفكر تغير حد لو كل واحد فكر في نفسه وشغل نفسه بيها وشاف ايه نقط ضعفها واشتغل عليها وقواها ساعتها بس مش هايقرب منك غير اللي يستحقك وهايبعد عنك كل شئ مش مناسب لك ساعتها بتكون اقوي داخليا وعندك صلابة نفسية تقدر تواجه وتقول لا وكل سكوت سكته هايطلع معاه بركان من الغضب و كلام كتير كان لازم تقوله وكان نفسك تقوله سيب نفسك وقول كل اللي في نفسك
ما انت ياما سكت وعمرك ما اتشافت ولا اتقدرت
بتوصل انك بتهد المعبد باللي فيه
بعد ما كنت بتمشي المركب لحد ما المركب غرقت بتطلع وتنجو بنفسك من جديد
بس نصيحة
نفسك امانة لما تلاقيها اوعي تسيبها تتوه منك تاني
مركب- من- ورق
