قصة

بنت ابويا

بنت ابويا
دعاء موسى
كنت في حفلة زفاف وسمعت اغنية بنت ابويا شوفت العروسة وهي بترقص مع ابوها على الأغنية بتعيط بس دموعها مكانتش دموع احساس لكلام الأغنية كانت دموع قهر ولوم وعتاب نظرتها لابوها كانت بتقول كان نفسي اعيش المشاعر الحلوة دي بجد مش تمثيل قدام الناس ونظرة الاب كانت غريبة كانه بيقولها ليه القرف دة انا عملت اللي عليا.
في نفس الحفلة شوفت بنت واقفة تتفرج على رقصة البنت وابوها ودموعها تحرق القلب وفي عينها نظرة بتقول كان نفسي بابا يكون معيا دلوقتي وحشني كلامه وحضنه.
وواحدة تانية عينها كلها حق مش شايفة غير ان ليه ابويا سابني واتخلي عني.
شوفت بنوتة حاضنة ابوها وبترقص معها في جنب لوحدهم وكلها فرحة وابوها عنيه كلها سعادة وحب وفخر ببنوته.
شوفت بنوتة بتبص لابوها و عينها بتقول هي المشاعر دي موجودة جوانا ولا لا وشوفت الاب عينه بتقول يا ترى بنتي فخورة بيا وبتحبني كدة ولا لا؟

كلمات الأغنية اثارت مشاعر واسئلة كتير جويا هو ليه احنا بقينا بعيد عن ولادنا بقى كل همنا نحوش لهم فلوس لكن محدش بقى بيحوش مشاعر وذكريات تفضل وتكون موجودة وقت ما نحتاجها.

افتكرت بابا الله يرحمه وافتكرت قد ايه كان طيب وحنين حتى وقت خلافتنا مع بعض كان بيتحمل غضبي وعصبيتي واستفزازي ليه ويرجع يصالحني تاني افتكرت مواقف كتير وقف في ضهري فيها وقواني.حقيقي مفتقدة وجوده جدا.
بعد مدة من الحفلة دي شاءت الظروف وقابلت البنات دول في تجمع تاني وارتاحت الفرصة اني اتكلم معاهم وسألت سؤال قولت يا بنات عايزة اعرف ايه احساسكملما بتسمعوا اغنية بنت ابويا.
شوفت نفس النظرة في عين كل واحدة فيهم بتترر تاني.
وسمعت منهم كلام في فخر وكلام في قهر وكلام تاني في لوم و اكتر حاجة وجعتني البنت اللي قالت ابويا موجود في حياتي صورة برواز بيكمل الشكل الاجتماعي اللائق للأسرة لكن فعليا ملهوش وجود ولقيت مهمات بين البنات الموجودين معظمها بيقول دي حقيقة. فاكرين البنت اللي كانت بتعيط وفي عينها نظرة بتقول وحشني بابا ردت علي البنات وقالتلهم انا بابا اتوفى من ثلاث سنين ومن ساعتها وانا مكسورة.
الردود كانت مخزنة ومخيفة جدا واللي اغلبها معناه كسرتك بموته احسن من كسرتك بوجوده.

رسالتي لكل اب متحرمش بناتك من حبك اعمل ذكريات حلوة معاهم خليهم فخورين بيك وبحبك ليهم خليهم يحبوا وجودك معاهم حسسهم انك امانهم وظهرهم و سندهم خد بناتك وانزل اتمشى معاهم منغير متزعق وتتنرفز وتعلي صوتك وتحرجهم في الشارع.
لما بنتك تطلب منك حاجة متقولش لا وتحرجها لو طلبها مش فوق قدراتك مفيهوش ضرر قولها حاضر لو مش في مقدرتك فهمها وقولها اما الظروف تسمح هانفذلك طلبك.
مش مقصود ان كل طلباتهم تبقى متاحة لكن المقصود انهم يحسوا انهم أميرات في بيوت أبائهن.
البنت اللي متشبعش حب وحنان في بيت ابوها عمرها ما هتعرف معنى الراحة والأمان.
عن عقبة بن عامر، قال: قال رسول الله صلى الله عليه وسلم: ” لا تكرهوا البنات، فإنهن المؤنسات الغاليات ”
هذا الحديث أخرجه الإمام أحمد وابن ماجه بإسناد صحيح عن عقبة بن عامر قال: سمعت رسول الله ﷺ يقول: من كان له ثلاث بنات فصبر عليهن وأطعمهن وسقاهن وكساهن من جدته كن له حجابًا من النار يوم القيامةوهذا يدل على فضل الإحسان إلى البنات والقيام بشئونهن؛ رغبةً فيما عند الله  فإن ذلك من أسباب دخول الجنة والسلامة من النار.
أتمنى رسالتي توصل لكل اب.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى