شوية أمانى

فكرانى مش سمعاكى
اتحداكى
تقدرى تخبيها
بتقولى الآه
وطول الليل بتعديها
قلبى بيتوجع معاكى
بس الآه بتاعتى
أنا بقدر اخفيها
بتبصى لى ومش عرفانى
خايفة منى؟
ده بيقتلنى
لو انا مش مطمناكى
مين ح يبقى لك جناح
تقولى عنه فيه برتاح
لو أنا مش مريحاكى
مين ح يقف وراكى
ويحسسك بالأمان
جسمك اللى عجز بقى غلبان
بيزيق كل ما تتحركى
ولسه برضه بتضحكى
اشباحك اللى كل ليلة بتحاربيها
ذكرياتك اللى ضاعت
ومش عارفة تجبيها
حبستك جوه أوضتك
شكل الشوارع اللى مشتيها
وضاعت ملامحها ومعانيها
اسئلتك اللى بتسأليها
بعدين تنسيها
وألف مرة بتعديها
ح استحملها
زى أسئلتى لما كنتى
بتستحمليها
كنت بسألك ميت سؤال
فى سطر واحد
كان ليكى طولة بال
تبتسمى و تردى عليهم
واحد واحد
سامحينى لو مش عارفة ابتسم
لو قلبى جاحد
سامحينى لو على طول
مستعجلاكى
نفسى مرة اشوفك
زى زمان وأنا صغيرة
والايام هيا هيا
مش متغيرة
عفية قوية
جميلة وحضن أمان
نفسى تكونى شيلانى
حبة كمان
مش أنا اللى شيلاكى
بس ح اقولك ايه؟
انا شايفاكى
قاعدة فى الارض متربعة
وفاردة اديكى
اجرى عليكى
وادخل فى حضنك
تضمينى
وأسألك
تقدرى تبلعينى
وترجعى تولدينى
ونعيد العمر من تانى
آهى حبة احلام
على شوية أمانى

راندة محمود