بخاف من النداهه
لكل الأحلام اللى حلمتها
وضاعت منى
من اول ما عرفت احلم
لحد ما وصلت لسنى
باعتذر لكل حلم
ما عرفتش احققه وسابنى
عشان ابويا خاف عليه
او صاحب كسر مجدافى
او مشيت فى الحلم حافى
من غير ضوافر او حوافر
اسفة انى معرفتش اعافر
وغرقت سفينتى
لكل حلم مرة ندانى بقدم اعتذار
كأنه نداهة ندهانى بنبرة احتقار
كل مرة تحلمى و يخدك االانبهار
تبدأى و تخططى
وقبل ما تبنى كل شئ ينهار
يا نداهه بتندهى المجذوب
ويجرى فى كل طريق ويا دوب
اول ما يحس انه وصل
بتتوصل كل الدروب
ويتوه المسكين
ويفضل تايه لسنين
لا عارف يوصل
ولا قادر يرجع التايهين
تتحدينى
يا نداهه اندهينى .
..للمرة الاخيرة
حركب مرة تانية السفينه
ح اصلح مجدافى الثمينة
ح ارسى على كل مينا
يا توصلنى لحلمى
يا حوصل لوحدى
يا ح مسك فى كل ايد تشلنى
ح احط الهاند فرى فى ودنى
ح اسمع بس الصوت اللى عجبنى
انا عارفة برضه انه مليون نداهه
ح تقفلى فى الطريق
انا عارفة انها ح تشكل ضدى فريق
مش انا المرة دى الغريق
انا القادرة اوصل لحلمى
انا صاحبة القلب الجرئ
راندة محمود
