Uncategorized

بخاف من الغول ….

بقلم: راندة محمود

الست بتخاف ترتبط بحد يتنمر عليها،او يعاملها على انها حاجة والسلام
الست بتخاف تضطر تقبل بضل راجل عشان تهرب من ضل الحيطة
بتخاف تستمر فى وضع مش راضية عنه عشان كلام الناس او نظرة المجتمع
عشان كده…الست بتخاف م الغول

فاكرين حكاية البنت لما شبت و اتجوزت
وعزلت على بيت راجلها
ولما البيبان اتقفلت اتحول لغول وكلها
واتيتمت عيالها
وبقت صورة ع الحيطة
وبعد ما خلصت الزيطة
الغول اتشيك وحط برفان
وخرج يدور على باب تانى
يخبط عليه…..اه يا بن الايه
لقى برضه اللى توافق وكله فى الحلال
راضية تكون ام العيال
ما هو ضل راجل ولا ضل حيط
يعنى من الاخر ح يكون لها بيت
لكن اختارت ….ما خترتش
عرفت …..ما عرفتش
حبت…..لا ما حبتش
اول واحد خبط فتحت……اتخطفت
فرحت بفستان ابيض و شبكة
وزى العنكبوت حضر الشبكة
وقعت. …شبكت …..فقدت الحركة
اتسمرت مكانها وهو بيتحول لغول
وبسرعة اسود فستانها على طول
تسمع بودانها خليكى فاتحة بيتك
متخلهوش مقفول
استنى عشان العيال ….عشان اللى بيتقال
استحملى ….استحملى…..بلاش استعجال
وانا واقفة مكانى متسمرة….وهو خلاص اتحول
بسال انا الاول اسيبه ياكلنى….لا محال
جريت على اوضة العيال
اخدتهم وجريت ع الشارع فى الحال
الشارع ماكنش شارع
كان متاهه بحضن كبير
كل زاوية واقف لى غول
اللى بيزحف واللى بيطير
وانا بجرى انا والعيال مش عارفة استخبى
خبطت فى غول وغول وغول
حضنت عيالى وقعدت ع الارض
والغيلان حوطتنا محضرة سنانها للعض
يالا خليهم ياكلونا وننفض

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى