بقلم….راندة محمود
الست بتخاف ترتبط بحد يتحكم فيها او يكون فى حياتها حد بيتحكم فيها أب أو أخ أو زوج لمجرد انها ست تبقى مش عارفة تاخد قرار كأنها بدون عقل وطول عمرها محتاجة لوصى مع انها واثقة ان عقلها يوزن بلد
عشان كده الست بتخاف م الاراجوز
قربت مرة من الاراجوز
ربطنى معاه بالخيوط
قولتله ده لا يجوز
كده اتخنق اموت
الدنيا ضلمت و المكان اسود
ما بقتش شايفة حد
اكيد ده حلم …لأ كابوس
تحتيه شبكة عنكبوت
مسكت جامد فى الخيوط
صرخت احمينى بلاش ترمينى
قالى متخافيش اثبتى ما تقعيش
لكن وقعت
ولاقيت المكان نور على خفيف
كانه نور شمعة يا لطيف
مين اللى بيقرب …ده طيف
مخيف
وقف ورايا و مسك الخيوط
انا مش اراجوز يا عم
سيب خيوطى
أنا مش كيس و لا شنطة
ما ينفعش اروح اونطة
لازم اتحكم فى ذاتى
وانا اللى ادور حياتى
مش ممكن يعنى تعلمنى وتسيبنى
ليه متصور انك لو سيبتنى
انا ح اعمل ذنب
ح تخبط من جنب لجنب
انا مش ملك فى لوح شطرنج
خليك انت فى حياتك
بطل تيجى عندى
انت مش قائد وانا عندك جندى
ما تقولش ده حب ولا اهتمام
انى اتحكم فى حياتى
ده ابسط حقوق الانسان
ادى المقص وح اقطع الخيوط
لو وقعت من ايدك برضه مش ح اموت
ح اقف ف الملعب و اشوط
من كل مصاعب الدنيا ح افوت
دخلت من باب الدنيا حر
لا انا اراجوز ولا ليا خيوط
