كتبت: دعاء موسى
ظل راجل ولا ضل حيطة.. مثل شعبي قديم بيستخدم للضغط على البنات و اقناعهم بقبول عريس.
المهم بقى المثل دة عمل ايه.. المثل دة اتسبب في نص مشاكل محكمة الأسرة تقريبا.. تفتكروا ليه؟! علشان مش اي راجل بيبقى ظل.
طب ازاي اعرف اذا كان الراجل دة ظل وسند ولا لا؟ اعرفي من الخطوبة من مواقفه معاكي ومع اهلك.
وانتي بتختاري زوجك متبصيش تحت رجلك بصي لبعيد لولادك ان شاء الله و خليكي متأكدة انك بتختارلهم اب.
اب عنده موح مش عايز ولاده يعيشوا زي ما هو عاش مهما كانت حياته كويسه عايزهم احسن وأفضل اختاري راجل طموح.
اختاري عيلة لولادك متقوليش انا مالي ومال اهله هو كويس معيا خلاص لا بصي لبكرة لولادك مين هيبقى حواليهم.
متقوليش.
ابو الزوج وام الزوج هما شخصيته بمعنى لو الاب بخيل تأكدي انه هيبقى بخيل لو الام كذابة تأكدي انه كذاب لو بيتهم هش تاكدي ان عمره ما هيبقى سند.
كان في مقولة بتقول قولي لاخت عريسك ربنا يرزقك زوج زي اخوكي لو قلتلك يا رب اتجوزيه لو قالت لا مش عايزة ولا سكتت اوعي تتجوزيه هي كدة بتظبطلك المقلب على مقاسك بالظبط.
ثاني وثالث وعاشر اختاري اب لولادك يبقى ظهرهم وسندهم
علشان منسمعش الولاد اللي بيتمنوا الموت لابهاتهم ولا اللي بيكرهوا أمهاتهم علشان اختارولهم إباء غلط.
طبعا كلنا هنقول الجواز قسمة ونصيب وانا هاقول الرسول عليه الصلاة والسلام قال اذا جاءكم من ترضون دينه ف وجوه. صدقت يا حبيبي يا رسول الله.
الكلام دة معناه ايه معناه ان اللي عارف دينه صح هيبقى زوج صالح يعني عز ف دينه يعني عارف حقوقه و واجباته يعني عارف ان التبظم صدقة يعني عارف انك من ضلعه وانك قارورة يعني عارف ان القوامة مش صوت عالي ولا مثنى وثلاث ورباع يعني عارف ان الدين في القلب مش في المظهر الخارجي.
يعني مبيفوتش فرض يعني مبيعملش حاجة مشكوك في حرمانيتها يعني بيغض بصره.
يعني لما بيجيلك زيارة وانتوا مخطوبين بيقعد في وسط اهلك ويتعامل معاهم كويس.
يعني ما يدخل عليكم البيت وأيده فاضية. يعني ميقللش منك ولا من عقلك ولا يتفه تصرفاتك.
أرجوكم يا بنات ويا أمهات اختارو صح. وربنا يرزق كل بنوتة زوج صالح. وتبقى ام جميلة تربى ولادها على الرجولة علشان متبليش بيهم بنات الناس.
مثل تاني مهم اوي يا بنات بيقول القرد في عين امه غزال.. اه والله صح. لما يتقدملك عريس حاولي تركزي مع مامته وهي بتمدح فيه شوفي عينها لو لقيتها زايخة. بتلف شمال ويمين وكل كلمة تقولها تبصله اعرفي انها كذابة و عايزة تخلص منه وتدبسك انتي فيه في الحالة دي اجري يا مجدي دة مش سيطرة منه على امه العقربة ولا نيلة ده امه غلبانة وفاض بيها الكيل وعايزة تخلص منه و كفاية عليها البلوة الكبيرة ي هي ابوه.
حماتك سر عريسك اوعي تقولي البعد عنها غنيمة و من خلالها هتعرفي ابو ولادك هيبقى ازاي. اكسبوا الحموات. لواتفقتي مع عريسك على حاجة ولقتيه رجع في كلامه بعد ما روح يبقى كدة الباشا ملهوش شخصية والست الوالدة هي راجل البيت.. لو لقيتي حماتك بتكلمك وتقولك م علاه ليه ولا عرفت الحوار اللي بينكم اجري يا مجدي.
في حاجات كتير تاني هنتكلم عنها مرة تانية.
