Uncategorized

من بريد القراء

من بريد القراء
دعاء موسى
صباح الخير.. عايزة احكيلكم حكايتي علشان كلكم تتعلموا منها ومحدش يعيش الحياة اللي انا عايشها.
انا م. م. ع متزوجة من ا. م. س وام لطفلين حكايتي بدأت من زمان اوي من اول مبدأت افهم الانوثة واني بنت انا مش جميلة واو ولا وحشة انا عادية لكن شايفة نفسي مميزة يعني انا بشوشة وشي بيضحك علطول اجتماعية جدا بأحب الناس عندي قناعة اني ما دمت مش باعمل حاجة غلط يبقى مفيش حاجة اخبيها عندي ٣ اخوات بنات وأخ وحيد لكن نعتبره مش موجود لانه فعلا طيف في البيت ملهوش دعوة بحد ولا بحاجة اخواتي البنات احلى مني شكلا يمكن لكن دمهم تقيل انا ترتيبي الثانية في البنات.. ماما طول عمرها شايفاني الوحشة المتمردة اللي بتعمل كل حاجة غلط علطول بتنتقدني في كلامي واختياري لاصحابي حتى في لبسي عمرها ما قالتلي الله اللبس دة حلو عليكي علطول شايفة اني وحشة. اني شبه الرجالة حتى شكل جسمي اللي هو صنيعة ربنا كانت علطول تقولي جسمك وحش كل دة كان المفروض يعقدني بس زي ما قلتلكم انا شخصية مختلفة اللي حصل العكس ثقتي في نفسي زادت وبقيت بأحب نفسي جدا اختي الكبيرة اتجوزت اول ما اتخرجت من الجامعة علطول اه نسيت اقولكم انا خريجة آداب فلسفة مع اني مكنتش باحبها حصل خير انا بقى اتاخرت في الجواز… او نصيبي اتأخر وابتديت الكارثة الحقيقية… انتي كبرتي وفرصك في الجواز بتقل ايه يعني لما تتجوزي واحد متجوز وتبقى زوجة تانية ولا تتجوزي واحد اقل منك في المستوى الثقافي والفكر ولا حتى أصغر منك بكتير كل ما تعدي سنة من عمرك الفرص هتقل… زهقت وقررت اختار احسن الوحشين في الناس اللي بتطلبني للزواج… زوجي الموقر الدكتور ا. م. س طبيب شكله من وجهة نظر البعض وسيم.. وأهم حاجة عنده شقة ومرتب ثابت.. اتخطبتله وفي اقل من سنة تزوجته ايام الخطوبة كانت كارثة كنت كل مرة باشوف بالتأكد من عيوبه اكتر واحكي لأهلي وردهم كان الكارثة الأكبر هيتغير ما انتي ما ينفعش تقعديلنا اكتر من كدة احمدي ربنا وانتي كنتي لاقية غيره..! وما إلى ذلك واتنيلت على عيني واتجوزته ورضيت بالغلب بس للاسف الغلب مرضيش بيا هههههههه
اه والله بخيل جدا جدا جدا كذاب جدا جدا جدا اناني اناني اناني من النهاردة ل ١٠٠ سنة قدام كل دة عادي اكتشفت ان ٧٠٪من الرجالة كدة بس اكتر حاجة مضيقاني اني فقدت شغفي للحياة بقت عايشة ومش عايشة باحارب علشان ولادي وبس مفيش حاجة من م. م. ع القديمة حاسة اني بقت هواء اه والله هواء خيال ذكرى ومش عارفة ارجع لنفسي القديمة ولا ابقى حد جديد واقفة في النص.. مش لاقية نفسي في حيطة اتسند عليها واعيط.. نفسي في مكان اهربله انا وولادي وانقذهم من الحياة المملة دي مش لاقية حد يدعمني في قرار الهرب مفيش سند مادي ولا معنوي.. انا ليه بكتب حكايتي مع انها حكاية عادية بنسمعها كتير…. اقولكم انا بأكتب هنا علشان اقولكم رفقا بالقوارير البنت مهما كانت وحشة بتحلو بأهلها بحبهم ليها واحتوائهم متخلوش بناتكم يفكروا بالهرب من جنتكم لنار الغريب مش كل الزواج مودة ورحمة خليكم الدعم والسند لبناتكم انا في البداية قولت عندي اخ ونعتبره مش موجود لانه عمره ما كان دعم ولا سند كان لما يجي من برة يلاقيني قاعدة لوحدي زعلانة او باعيط يبصلي ويضحك ويدخل اوضته وبابا كان دايما يقولي ماما اقربلك مني لكن الحقيقة انا كنت لوحدي وقررت ان ولادي مايبقوش لوحدهم انا هابقى السند ليهم انا هابقى الام والاب بس مش عارفة ازاي ولا ابدء منين قوليلي اعمل ايه وابدء منين.
دي حكاية من بريد القراء اختارتها علشان تقريبا دي مشكلة نص المجتمع.. من وجهة نظري الحل بسيط دوري على نفسك اعملي حاجة بتحبيها اشتغلي حتى لو شغل من بيتك بعيد عن تعليمك قربي من ولادك وافرحي معاهم وبيهم خلي وقتك معاهم كله حب وضحك وانبسطوا سوا. ستات كتير عملوا مشروع تنضيف خضار وتجهيزات ونجحوا فيه جدا وهما في وسط ولادهم. حبي نفسك تاني رجعي ثقتك في نفسك متسمحيش لحد يقلل منك أو ينتقدك نقد سلبي عجبني انك عايزة يبقى سند ودعم لولادك وده في حد ذاته دافع قوي علشان تحبي نفسك وتنجحي في انك تلاقيها مش هاقول ان  الكسر اللي جواكي هيختفي لا هيبقى علامة بتوجع علشان تفكرك بهدفك انتي أقوى من اي حد اشتغلي علشان تبقى مسنودة على نفسك ماديا وترجعي دايرتك الاجتماعية وشغفك بالحياة من تاني اقرأي واتعلمي من جديد مع ولادك.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى