مطالب الأم فى عيدها 2021 (الولاية حقي)
كتبت/ دعاء موسي
النهاردة مش هاتكلم عن الام وحقها على ولادها ولا على المجتمع.. النهاردة هاتكلم عن قضية شاغلة الرأي العام على السوشيال ميديا وأطلق هشتاج مطالب بحق الولاية للام
طبعا انتقادات كتيرة انطلقت في الاتجاه المضاد ومنها القائل انتم هتخالفوا شرع ربنا واللي قال هو في ايه هما الستات عايزين يكوشوا على الدنيا بحالها.
لا والله الموضوع مش كدة خالص الموضوع ان زمان ايام ما كان للرجال قوامة فعلية وكان الشرع يطبق كما انزل الدنيا كانت تمام مكانش في ام بتتزل على مصاريف ولادها مكانش في اب بينكر نسب ولاده لما كانت الست بتطلق كانت بتسرح بإحسان كان في صدق ووضوح في العلاقات مكانش في راجل بيزل مراته بولادها ولا أهل زوج بيحطوا مرات ابنهم في مقام الجواري والخدم علشان تربى ولادها ولا هياخدوهم منها ويرموها في الشارع مكانش في راجل بيحوش مرتبه ويستني مراته تصرف على البيت والعيال كان كل واحد عارف حقوقه واجباته.
مكانش فيه جد أو عم بياكل ورث ولاد اخوه اللي ابوهم مات علشان هو الولي الشرعي و لا أهل بيفرضوا على مرات ابنهم المتوفي تتجوز اخوه علشان تاخد ورث ولادها وحقهم من ورث ابوهم.
تعالوا نشوف الأوضاع النهار ة شكلها ايه من واقع الحياة
واحدة مطلقة وعندها طفلين من أصحاب الأمراض المزمنة الاب رافض يصرف على علاجهم او تعليمهم الام تعمل حاولت تعمل علاج على نفقة الدولة او معاش تكافل وكرامة اللي أقره سيادة الرئيس للاصحاب الأمراض المزمنة لتفاجئ بأنك مش معاكي ولاية ولازم الاب اللي يمشي في الإجراءات ويوافق ان المعاش يطلع باسم الام.
واحدة تانية زوجها اخد ابنها اللي عمره لا يتجاوز العام وقالها انا وابني عند امي عايزة ت؛ وفيه تاني تيجي تخدمي امي والجزمة فوق راسك. ومع انها حاضنة الا انها مش عارفة تعمل ايه القضاء مشوار طويل ابنها هيبقى عريس وهي محرومة منه.
زوجة بتشتغل وبتحوشمرتبها في دفاتر توفير هي اللي فاتحه بنفسها لاولادها زوجها اصاب بمرض شديد ودخل المستشفى ومحتاج مصاريف راحت تسحب فلوسها اللي في حسابات ولادها اللي هي عاملهم بنفسها يتقالها لا حضرتك مينفعش لازم الاب.
وطبعا الولاية للمطلقة على أولادها بتاخدها بمعاناة.
واحدة طفشت هي وزوجها من بيت العيلة وكان عامل باليومية وربنا كرمهم وبقي عندهم محلات و بيت وفجأة الزوج اتوفى اهله اخد كل حاجة ومنعوا ورث بناته لان جدهم الولي عليهم عايز امهم تتزوج ابنه التاني او ملهاش حاجة عندهم حتى بيتهامشوها منه وبقيت هي وولادها في الشارع.
في مقابل الولاية الشرعية والقانونية للرجل هو بيعمل ايه تعالوا نقارن كدة بين الام والاب طبعا الكلام دة بيحصل بنسبة ٩٠ ٪ الا من رحم ربي.
نشوف بقى المقارنة الام بتطبخ وتغسل وتمسح تذاكر وتؤدي دروس وتؤدي تمارين وتؤدي لدكاترة وتبقى بتعمل مليون حاجة في نفس الوقت و تحوش علشان كسوة الصيف وتحوش علشان كسوة الشتا و المصيف والولاد محتاجين ايه والبيت ناقصه ايه ورمضان داخل علينا وبعده العيد ولبس العيد دة طبعا غير شغلها اذا كانت بتشتغل.
الاب بقى راح شغله ورجع قعد يطلب طلبات ولا اللي قاعد في كافيه طب المصروف خلص ومش مكفي طلبات البيت والولاد ويكون الرد اتصرفي وانا هاعملك ايه هي دي امكانياتي اصلك مبذرة وفري شوية وهوب يقلب الترابيزة عليها ايه اللي انتي عاملة في نفسك دة انا حاسس اني مشمتجوز فين الشعر فين اللبس في المكياج في الانوثة..! ايه دة هو في ايه حضرتك الست بتكلمك في مصروف بيت مش مكفي طلبات عيالك يا راجل يا مسؤليا راع يا رب البيت.. انا هاروح اتجوز واشوف واحدة تدلعني.
أطلقت الست تتزل بقى على كل حاجة ويجي يقولها رؤيا طب اصرف على ولادك الأول وبعدين قول رؤيا ولا تعالي شوفهم في البيت ليه تمرمطهم في محاكم ونوادي الرؤيا. وليه من الاول تبعد عنهم علشان مش عايز تصرف عليهم.
محتاجين توقيع الاب في استمارات المدرسة أو البطاقة الشخصية بالزل والخناق واحتمال كمان متعملش علشان الام اللي طالع عينها ملهاش حق الولاية.
الزوج سافر ومراته حامل ولدت وهو مش موجود مينفعش تسجل ابنها لازم الاب طب ما هو في قسيمة زواج والأب مسافر نعمل ايه اصل مش من حقك الولاية.
عايزة تنقل ولادها لمكان سكنها الجديد علشان البيه اتحمله بتمكين وجاب زوجة جديدة مع ولاده وطليقته في نفس الشقة فسابتها منعا للمشاكل انقل ولادي في مدرسة قريبة للسكن بقى
لا مينفعش لازم الاب أصلك مش معاكي ولاية.
وقيس على كدة بقى حاجات كتير جدا حتى لو الام والاب مش منفصلين لكن المسؤلية الكبرى على الأم يبقى من حقها الولاية القانونية.
في عيد الام ٢٠٢١ الامتطالب بحقها في الولاية على ولادها والهشتاج بيقول.. الولاية حقي..
