متابعه/غادة إبراهيم
لما زرتوا المدينة المنورة حسيتوا إنكم بتحبوها اكتر من مكة ؟!
ولو مزورتهاش سمعت من حد إنه قالك أنا إرتاحت نفسياً فى المدينة عن مكة ؟!
لو عايزين تعرفوا السر فهو من زمان .
لما سيدنا النبي ﷺ هاجر للمدينه .. الصحابه كانوا تعبانين .. ومفتقدين بلدهم جداً .. وكانت المدينه مليانة مشاكل وضغوط كتير عليهم رضوان الله عليهم ..
فى ليلة ..
و سيدنا النبي ﷺ قاعد مع الصحابة .. سيدنا بلال افتكر مكة .. وحزن قلبه حزن شديد وقال بيت شعر يتمني فيه انه يرجع لبلده حبيبته ..
فقال :
أَلاَ لَيْتَ شِعْرِي هَلْ أَبِيتَنَّ لَيْلَةً … بِوَادٍ وَحَوْلِي إِذْخِرٌ وَجَلِيلُ
ف سيدنا النبي ﷺ دعا ربنا وقال :
اللَّهُمَّ حَبِّبْ إِلَيْنَا المَدِينَةَ كَحُبِّنَا مَكَّةَ أَوْ أَشَدَّ، اللَّهُمَّ وَصَحِّحْهَا وَبَارِكْ لَنَا فِي مُدِّهَا وَصَاعِهَا، وَانْقُلْ حُمَّاهَا فَاجْعَلْهَا بِالْجُحْفَةِ(البخارى)
بس كدا
الحبيب دعا و رب العالمين تقبل الدعاء ..
فاستجاب الله لسيدنا النبي ﷺ وحبب للبشريه كلها المدينه كحب مكة .. بل أشد ..
عشان كدا كلنا بنحب المدينه اكتر
وكمان ربنا صحح هوائها لدرجة ان النبي سماها بعد كدا : “طيبة” من طيب الهواء ..
عشان كدا احنا لما بنروح .. بنستشعر إن حتي هواء المدينه مختلف عن اي مكان تانى في الكون .. حتي هواها جميل ..
جوها جميل .. وناسها جميله .. وريحتها جميله .. كل حاجه فيها جميله .. من جمال سيدنا رسول الله ﷺ
اللهم عودة لمن زارها من قبل و زيارة عن قريب لمن لها يشتاق ولمن يسكنوها لا تجعل هذا آخر عهدهم بها
وصلى اللهم وسلم وبارك عليك يا حبيبي يا رسول الله
