كل مافيها….
بقلم/ سحر أبو العلا
كل ما فيها مشتاق ليه
روحها عنيها حتى اديها
مشتاقة للمسة اديه.
لسة قلبها مشغول بيه
نبضه دايما دايما ليه
حتى الفكر بيحلم بيه
نفسها صدفة تقابله
تلمحه و تحضن عنيه
لسة بتردد فى اسمه
لسة كلامها كله عليه
لسة بتحكي بيكره ايه
لسة لما بتشرب قهوة
تفتكر انه شربها سادة
بس عشانها مع انه
كان دايما يشربها زيادة
لما كان يسمع وياها
غنوة هي حباها
لما كات تحكي ويسمعها
حتى لو كانت اعادة
ما هى اصلها جدا نساية
تحكي القصة وترجع تاني
تحكيها
و لا مرة قالها قديمة
لسة فاكرة ضحكته
لما تتلغبط قصاده
لسة فاكرة نظرته
لما بتقلد حركاته
زي طفلة متشعبطة
فى اديه
خايفة يمشي وتفضل هي
مشتاقة ليه.
