بقلم: راندة محمود
البيت و العيلة و اللمة
ووقفة اخواتى ع القمة
الريحة الطالعة من بيتنا
ترجعنا جرى من شمة
دى ريحة بطة مدبوحة
وطشة ملوخية فحفوحة
فيه احلى من كده بالذمة
الجد هيبة بالعمة
وستى الحلوة دى نعمة
ويجى العم و العمة
والخال و الخالة سموحة
والبيت بيشغى كده بناسه
البيت عواميده و اساسه
وعوماره و حراسه
بيخلوه جنة منداسة
فى كل ياما ضحكاية
ونفرش ع الارض دى ملاية
ونتلم كلنا فى دايرة
وجدى يحكى لنا حكاية
ويجى جارنا ع السيرة
وتبقى دايرتنا كبيرة
ويجى جار وجار وجار
وهب طلع النهار
اتفركشت اللمة
وضاعت الهمة
وسكتت الضحكة
وخلصت الحكاية
ونزلت كلمة النهاية
البيت موجود لكن ساكت
و نوره خافت بهتان
رمادية بقت الحيطان
وقفل كبير ع البيبان
والسكاااااااااااااااااان؟
فين السكااااااااان؟
فيه ناس كتير ماتت
وناس ع الذكرى نامت
ومن يومها رافضة الصحيان
ويفضل البيت شاهد
على كنا وكان ياما كان
