نفسي
راندة محمود
نفسي في زلزال
يهز النفوس و يصحيها
تنشق الروح و تبلع بلاويها
ترتج القلوب ويتهد اللي فيها
سواد وطمع و غل وكبر ماليها
نفسي في بركان يحرقها
ويطيح بيها
يمكن ترجع للونها الأبيض
وترجع لربها اللي مسويها
نفسي في إعصار
يرجع كل حاجة لمكانها
بعد ما تشقلبت الدنيا
وتشقلب كيانها
الطيبة بقت عبيطة
والخبيث غلبان
واللي مسلمها لله
بقى مخه تعبان
والنمام و اللي سيرة الناس
في بقه لبان
بقى فصيح وصاحب بيان
واللي فى حاله
سيرته بقت على كل لسان
واللي يقول وماله
عشان تعدي بسلام
بقى سلبي و جبان
نفسي في طوفان
يعدي ع القلوب ويفتشها
ويغرق اللئيم
و الطيب بس يعيشها
وسفينة نوح تقفل
على شعبها و جيشها
وترمي للشياطين الاضيشها
لكن لا زلزال و لا بركان ولا طوفان
قادر على الناس اللي نفشه ريشها
بس ح يجي آوان تتهز الأرض
و تخرج خبائثها
ويتعدل الحال و الخير
يملاها و يفرشها
