المرأة والطفل

نماذج الأمهات….

نماذج الأمهات….

متابعة/ البتول إبراهيم 

1: الأم الضحية:
اللى بتتضرب أو تتهان أو تتخان ومستسلمة وعايشة حزينة كئيبة بترثى حالها.
ودى بتطلع يا انسان ضعيف مغلوب على أمره مستسلم زيها ياشخص مستبد قوى بيستخدم فتونته عشان يحمى نفسه أنه يكون مكانها يوم.

2: الأم الشبح:
موجودة ومش موجودة بنسميها “emotionally unavailable”
بمعنى مش بتعرف تكون انعكاس لمشاعر طفلها، مش بتسمعه، مش بتفهم أحاسيسه مش بتعرف تديله رد الفعل اللى هو محتاجه.

ودى بتطلع انسان عنده احتياج ملح ومرعب أنه يتشاف ويتسمع شخص جعان اهتمام عطشان حب وحميمية.

3: الأم النرجسية:
ام مش بتشوف في ابنها غير اللى هى عايزة تشوفه، ابنها بالنسبة لها زى العربية اللى راكباها والموبايل اللى شايلاه، أهم حاجة شكله ، نظافته، درجاته، تسريحته لكن مخاوفه ومشاعره وقلقه واحتياجه ورغباته ولا الهوا.
ودى بتطلع طفل اسمه trophy child كل دوره أنه يبقى People pleaser
يكبر ويبقى بنى آدم كل دوره يبسط اللى حواليه ويدوب فى احتياجاتهم ورغباتهم وينسى هو مين وعايز ايه لدرجة مش بيبقى عارف ايه اللي بيبسطه بجد وايه اللى اتعود أنه يعمله علشان بس يبسط اللى حواليه.

4: الأم المتسلطة:
المسيطرة اللى ياتسمع كلامها وتمشى على مزاجها علشان هى أمرت بده ياتطردك من جنتها بأنها تخاصم أو تاخد جنب أو تعاقبك بالهجر وحرمانك من أمومتها المتمثلة فى أى وكل حاجة.

ودى أم بتطلع شخص اتعود على العطاء الرهيب عشان يفضل محبوب، شخص يخاف يغلط فا يتهجر، شخص مش عارف يحمى حدوده النفسية، بيقول حاضر علطول علشان لو قال لأ حيبطلوا يحبوه.

وطبعا كل ام نرجسية هى ام متسلطة لكن مش كل أم متسلطة هى ام نرجسية.

5: الأم المؤذية:
ودى الأم اللى بتنتقد أو تسخر من ابنها طول الوقت وقدام أى حد، بتقلل من شأنه، بتقارنه دائما باللى حواليه.
ودى بتطلع بنى آدم حاسس نفسه دائما أقل من اللى حواليه، حاسس دائما أن فيه حاجة غلط، متخيل أن كل الناس شايفاه قليل وبتسخر منه وبتتريق عليه.

6: الأم المرعوبة:
ال over protective اللى بتوطى هى تربطله الجزمة احسن يربطها ربطة ضعيفة فتفك فيتكعبل فيقع يموت، اللى بتخوف ابنها من صحابه وجيرانه وعينيهم اللى هتحسده، اللى بتعلمه مايقولش درجاته لحد ويخبى ساندوتشاته من زمايله، الأم المتوجسة دائما المقتنعة بنظرية المؤامرة.
ودى أم بتطلع حد هش ضعيف مرعوب، حاسس ان العالم مكان خطير غير آمن وفاقد الثقة فى كل اللى حواليه.

7: الأم الطير المهاجر:
ودى الأم اللى هجرت طفلها سواء سابته لحد يربيه، سافرت وسابته لأمها، اتجوزت بعد طلاقها وسابته طفل لابوه، كان عندها اولاد كتير وأدت أمها واحد منهم تربيه لها.
ودى أم بتطلع انسان مرعوب يتساب، بيلزق فى الناس اللى بيحبهم، لو اتصل بحبيبته وماردتش يبقى عشان اكيد بثخونه أو بطلت تحبه.

8: الأم المتخلية والمتنمرة
فاكرين عماد حمدي
انت مَش ابني:
انت مش شبهى انت شبه ابوك، انت طالع تخين لعمك، انت طالع اسمر لعيلة أبوك، انت بتعمل كذا زيهم، انتى طالعة لعمتك قصيرة.
الأم اللى بتحسس ابنها دائما أنه مش من جنسها، مش شبهها مش بينتمى ليها، اللى هو ناقص تقوله ( انت مش ابنى، انت لقيط. عارف يعنى ايه لقيط؟!

ودى بتطلع بنى آدم حاسس نفسه لاينتمى لأى حاجة ولا لأى فصيل، حاسس بالاقصاء، وأنه doesn’t fit in، شاعر دائما بغربة ووحدة فى أى مجتمع أو مجموعة بينتمى ليها, بيطلع حاسس انه
doesn’t belong

9: الأم الأكيد فى أحسن من كده:
ودى أم دائما بتطلب من ابنها standards معينة فى نجاحه بقى فى نوعية أصحابه، فى طريقة تطبيقه لهدومه، عندها دائما توقعات عالية جدا منه ومهما يعمل بتوصله أن اكيد كان فيه أحسن من كده، رضاها من رابع المستحيلات.
ودى بتطلع انسان مش راضى عن أى حاجة بيعملها، شخص بيلهث وراء الكمال، دائما حاسس ان اكيد كان فيه أحسن، دائما شايف نفسه
“not good enough”

10: الأم المدللة والمتسامحة طول الوقت:
ودى الام ، اللى طلبات ابنها مجابة، اللى كل حاجة مسموحة، اللى مابتقولش لأ ابدا، اللى مهما ابنها يغلط ابننا مابيغلطش واللى عنده معزة يربطها، فاكرين الجملة دي اللي قالها اب وده حبيب عين أمه وجماله مفيش منه.

ودى بتطلع انسان نرجسى شايف نفسه يستحق معاملة غير كل الناس، يكسر قوانين عادى، يجور على حقوق ماشى.
انسان شايف دائما نفسه عظيم مفروض كلامه يتسمع لأنه طبعا طبعا صح على طول الوقت أصله مابيغلطش .

فلو انت أم و لك واحدة من الشخصيات دول فأكيد انتى ماتتمنيش ابنك يطلع بيعانى ويبقى بائس تعيس حزين.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى